陳庭欣2010年參選港姐，獲冠軍入行，話咁快就9年時間。入行後佢主力做主持，幾乎每晚七點半打開電視都會見到佢主持《東張西望》。主持功力好，唔少活動都會搵佢做司儀，大台各大慈善籌款活動佢都係常駐主持之一。除咗主持，佢都有Keep住拍劇，雖然至今都無做過女一，但前年喺《踩過界》做跨性別人士嘅一幕「女頭男身」，令觀眾印象好深。上年《兄弟》佢做第四女主角Olivia，打戲親身上陣，唔用替身，網民大讚佢夠專業。入大台9年時間，佢發展都算平平穩穩，無乜大起大落。
不過唔講可能無人知，佢間唔中都會唱吓歌，雖然講唔上好聽，但始終唔係歌手，算係不過不失。佢之前仲作為香港代表為荷里活片《大娛樂家》同主唱Keala Settle合唱全球版主題曲《This is me》。「狼人」Hugh Jackman仲親自去探班，好威水！而家好有可能做豬年新娘嘅佢，愛情事業兩得意，《壹》仔都向佢講聲恭喜啊！
來源 source: http://nextplus.nextmedia.com
|
鍾意就快D Share啦！
|
|
|
