駱應鈞爸爸係樂善堂觀塘學校前校長駱存斌，大家姐係《信報》創辦人林行止老婆駱友梅，細佬係香港資深大律師駱應淦，講起當初入行，老豆絕對唔支持！
駱：爸爸當時係好唔鍾意，我記得簽約時未夠21歲，要家長簽名，佢當時都有呻幾句，以當時嘅父子關係，佢都會呻幾句嘅話，即係表示極之唔接受，不過你鍾意就無辦法
蓋：觀眾睇你會覺得係有名有利，好成功，其實喺工作上有冇經歷過失意或者辛酸？
駱：我諗除非係好一帆風順，一出道無耐就順風順水嘅，如果唔係你問十個，我諗十個嘅答案，甜酸苦辣當中，梗係苦同辣多過甜啦，基本上可以話係唔開心日子會多過開心日子，因為當你有啲工作做嘅時候，當然希望會愈嚟愈多，但係世事嘅嘢無話咁順利，如果係咁順利，而家可能已經唔係呢個位置，可能會再高啲。所以基本上會有好多難言嘅挫折，尤其大台就最鍾意咁樣，呢套戲可能戲份好重，下一套戲就變得好輕。
蓋：演員每次工作都好長時間，你又試過可能喺內地幾個月都返唔到香港，男人背後都總有個女人支持，你嘅女人有冇覺得好悶？
駱：佢比較好，唔會跟住嚟。因為都老夫老妻，大家都會好了解，互相遷就，如果唔係都唔可以相處咁耐，一早已經出現問題，既然無問題發生，基本上平平淡淡已經係好事，唔係咁多驚喜、刺激，因為已經互相適應對方。蓋：有冇咩感激說話想對佢講？佢都好厲害，因為經常要喺度默默等待？
駱：我心裡面都好多謝太太，因為講就輕鬆，但喺無準備下，突然之間就無咗一份做咗咁多年嘅工作，其實都會好徬徨，佢都知道我好感激佢，因為之後我都有讚佢。有時候大家有啲意見不合嘅時候，我都會諗番當年老婆點樣對我，咁我都會讓吓步，因為佢都咁支持我。就係因為識得咁樣自己反思吓，兩個人至可以相處咁多年，因為我都算遲婚，唔算結咗好耐，但唔經唔覺都廿九年，出年就三十周年，我都覺得日子其實唔短。
蓋：咁多年嚟，點解可以零緋聞？
駱：因為講句俗啲，係因為我玩唔起，無本事，同太太簡簡單單生活，唔好有太大壓力，已經好感恩，唔敢再節外生枝，因為怕輸唔起，唔敢行差踏錯。
蓋：有時候唔係你做主動，係對方埋身喎，無呢種情況？
駱：都好少
蓋：少即係有啦？
駱：因為我個人唔係好主動，有時候成班人聚會，總有一兩位會談笑風生，我就唔係，多數係聆聽嗰個，變咗你本身唔係嗰種談笑風生，好幽默嗰種人，啲女人明知你口花，但都會鍾意嗰啲，唔會悶嘛，會諗啲嘢嚟引人笑，我又唔係嗰種人，所以好少會遇到有女士對我主動，完全無遇到。
蓋：你都唔算同人爭，或者好爭取嘅性格？
駱：每個人都話性格決定命運，而我本身都好相信，我真係唔鍾意同人爭。本身可能都有少少信心唔夠，又唔鍾意同人硬撼，最主要都係性格問題，但直至而家其實都無乜大改變，都係鍾意穩穩陣陣，有時啲嘢如果要去爭取嘅，就會睇吓機會有幾大，會同自己講，完全唔客觀嘅，唔好同人爭喇，無就算啦，咁樣其實係好唔積極，但換個角度講，就係會俾少咗好多壓力自己，因為如果你好強勢，樣樣嘢都要攞到盡，乜嘢都要贏嘅話，我會覺得個人好辛苦，我亦都唔係嗰種性格，我寧願無咁叻，無咁有出息，總之自己過到日子，生活上過得到就算喇，我就係咁嘅性格。
策劃：肥A
攝錄：黃志明、吳斯金
化妝：毛毛（嫁妝）
來源 source: http://nextplus.nextmedia.com
|
鍾意就快D Share啦！
|
|
|