掃呢頁CODE去手機

2019年3月8日 星期五

【天涯相逢〡蓋世寶訪問戴志偉】藝人收入低 每晚走6場唱歌搵錢 戴志偉:我係唔捱得窮嘅人 __,曾志偉,蓋世寶,

蓋:歡迎今日嘅嘉賓戴志偉哥哥,歡迎你。戴志偉呢個名,相信大家都唔會陌生,亦都會聯想起《足球小將》入面嘅戴志偉,你係咪因為咁樣所以鍾意踢波呢?【天涯相逢 ...




蓋:歡迎今日嘅嘉賓戴志偉哥哥,歡迎你。戴志偉呢個名,相信大家都唔會陌生,亦都會聯想起《足球小將》入面嘅戴志偉,你係咪因為咁樣所以鍾意踢波呢?

戴:其實我唔知有冇關係,不過好似我踢波嘅時候,仲未有呢套卡通片。

蓋:志偉哥哥好年輕時已經加入三色台,開始演藝道路,係咪好快已經得到好多機會?

戴:其實我幾夠運,實習時已經有人賞識,第一套拍嘅劇就係《射鵰英雄傳》,其實好偶然,角色本來係梁朝偉演嘅,同郭靖由細玩到大嘅蒙古王子角色,但係可能因為佢太忙,所以就搵咗我做,我最記得當時因為時間緊迫,戲服仲啱著,但啲鞋就唔啱,因為之前已經試好鞋,而我隻腳比較大,所以要剪開鞋踭後面位置,因為只要前面睇到無問題就得,後面剪開咗問題不大,無人會知道,咁嘅情況都維持咗成個月,到有新鞋嘅時候至換番俾我。

蓋:嗰次就係你第一個好有發揮機會嘅角色?

戴:無錯,角色本身好有發揮,同埋劇集都非常出色,可以講係一個經典。

蓋:之後《新紮師兄》嘅張家明令你嘅知名度更高,定係《射鵰英雄傳》嘅拖雷已經幫咗你好多?

戴:其實演拖雷時我仲係新人,不過好有趣,拖雷呢個角色後勁好厲害,喺國內而家仲有好多人睇緊拖雷,記得八三年版嘅《射鵰》,因為佢哋好欣賞套劇。當年喺香港雖然都有好大迴響,但都無咁厲害,其實幫助我最大嘅係《新紮師兄》,因為將奸角嘅演法同形象改變咗,因為最初都官仔骨骨,唔係好似大奸角,我喺戲中飾演大反派,但我唔係真係做反叛,而係時代同環境迫使,結果做咗好多傷害人嘅事,但其實喺我嘅出發點,全部都係覺得自己無錯。嗰套其實係一套好好嘅戲,我本身都好鍾意,總數拍咗四十集。

蓋:別人睇藝人好風光,其實你有冇真正捱過?

戴:其實我個人好實際,我覺得理想重要,但麵包都好重要,所以一直以嚟都無擔心過經濟,因為我有幾份工作。當時我有唱歌,其實一直都有唱歌,當年電影公司執笠,我好徬徨,當時就開始喺夜店唱歌,原來夜店收入好好,走幾個場。

蓋:係一份職業,係駐場歌手?

戴:每晚會唱五、六場,因為我識得彈結他,所以可以勝任;讀緊訓練班嘅時候,我其實仍然做緊,因為你知道讀訓練班,全年都無工作,因為當時我係日班,日班需要全職,但因為我夜晚唱歌,於是無令我經濟間斷。我係一個唔捱得窮嘅人,無錢係唔得嘅,一定要有錢,即係唔可以有理想,所以唔會坐喺度等人發掘,然後再努力,我係無咁樣做過。我可以話係夠運,或者如果我全力做,結果會更加好。當時我好穩陣,首先要保證自己嘅收入,會令家人或者自己過得舒服,另外亦都真係好夠運,因為本身識唱歌,加入TVB時仍然唱緊歌,知名度提升咗之後,又開始拍戲,嗰段時間就最辛苦,三樣工作,唱歌、拍電視、拍電影,真係好辛苦,佔晒我所有時間,我試過五日五夜未好好瞓過一覺,真係好辛苦。化妝時小睡片刻,到換古裝時,啲人周圍搵我,原來攤咗喺啲衫瞓着咗。

蓋:同志偉哥哥傾咗一陣,感受到你係一個好識計算、識打算嘅人,有打算嘅人點解會留喺三色台30年?

戴:其實我覺得好舒服,因為唔需要擔心,公司有好多資源,本身亦都有自己資源,一直有唱歌、拍電影,到我覺得太攰嘅時候,其實喺八十年代中期,開始有做地產生意,當時一邊拍戲,一邊做地產生意,其實唔需要擔心資源問題,唔會再去諗轉變,會安安份份,所以其實我係幾忠心,做咗三十年,從來無轉過任何媒界。

蓋:亦都無諗過?

戴:無諗過,其實有段時間有人搵過我,但係坦白講,唔係用好多資源挖我過檔,又係用番而家嘅資源,我做咩要走呢?因為過檔其實好冒險,喺呢度好多人認識,同埋大家好熟,過到去全部又要重新開始,係咪會有咩嘢配合、配套俾到我,同埋我有冇咁嘅需要呢?於是我就無考慮。有一段時間好多人跳槽,有人接觸過我,但我無接受。

【蓋世寶訪問你】參加第八期訓練班的蓋世寶Lulu,入行後被派去主持兒童節目,一做就做了18年。15年轉了去戲劇組的Lulu本來以為有新開始,可惜不擅擦鞋不懂搲撈的她怎搲都沒有用!Lulu離開工作了23年TVB,不定時為壹周刊主持「蓋世寶訪問你」,大家要留意呀!

攝錄:黃志明、蕭敬漁

策劃:肥A

主持人:蓋世寶

化妝及髮型:毛毛


鍾意就快D Share啦!