記得蓋世寶Lulu上次訪問講過，自己錯過咗開花結果嘅一段情。「已經錯過咗，我問自己有冇後悔，有冇做錯，呢個世界喺愛情方面無對錯，兩個人嘅事第三者係唔會知道咁多嘅，我的確錯過咗。佢有正式求婚，我考慮咗接近一年，結果都係拒絕咗，對嗰件事好內疚。」Lulu口中嘅佢，就係曾經拍拖7年嘅林遠迎，今日佢特別請嚟舊情人做《蓋世寶訪問你》嘅嘉賓。
蓋：歡迎今日嘉賓林遠迎Jason，相信有睇開電視嘅朋友，對你都一定唔陌生，不過佢哋又未必知道，原來你改咗名，叫做……
林：叫做林景弘，風景個景，因為有好多個弘字，我每次講嘅時候都要解釋，泓大嘅泓無三點水。
好想知道，當日Lulu拒婚，大家分手收場，Jason有冇嬲過佢呢？
林：分手之後其實好少聯絡。我嚟得做訪問，知道亦都唔怕外邊有咩說話，自己行得正企得正！
蓋：Me too！
Jason接受舊愛Lulu邀請做訪問，佢老婆有冇呷醋呀？
林：無喎，我都會同佢講，而佢都好相信我，我會話俾佢聽，Lulu搵我做訪問，我覺得有咩可以幫到佢咪幫囉。
蓋：我解釋啦，其實每個人都有過去，過去嘅事情唔需要介意。
林：識佢之前仲拍過兩次拖。
蓋：點解我唔知嘅？
林：唔係呀，你知嘅。我哋都係做番朋友，無乜問題，又唔係做啲乜嘢壞事，搞到以後做唔到朋友。
以朋友身份，Jason會點樣勸勉佢，四十歲人應該要結婚？
林：又咁樣講，我其實覺得唔需要轉變喎，鍾意結婚咪結，唔鍾意結咪唔結囉，其實喺呢一刻我都覺得唔結婚其實幾舒服嘅，結咗婚會有壓力，睇吓你自己肯唔肯去承受呢個壓力囉。當年你個訪問都講得唔錯，你覺得自己未係時候吖嘛。
蓋：要我應承嘅話，其實真係一分鐘就夠；要拒絕嘅話，唔係講緊嗰樣嘢，係所有嘢，我知道自己係咁樣，當年又仲細呢。
林：人其實好簡單，只要按照自己想做嘅去做咪得囉，無話要對得住邊個，對唔住邊個，自己覺得咁樣開心咪去做囉。
蓋：俾你再揀，會唔會想做女人？
林：我點解要做女人？
蓋：因為男人嘅責任太大。
林：今時今刻又唔一定係咁樣講嘅，只係有啲嘢我自己想揹上身，我覺得下世再做嘅話，都係想做男人，唔鍾意做女人，做一個無責任感嘅男人。
蓋：我都想呀，做一個靚仔，但係無責任感，唔使負責任。
Lulu同Jason拍拖7年，雖然最後分手收場，但仍然做到朋友，唔係成日見，但心裡總有個位置留俾對方。
林：其實都真係無試過咁樣坐低傾偈，就算喺同一個場合都唔係講太多嘢，但都會關心對方嘅，都一定會問吓近況。
蓋：我其實今天有諗過帶咆咆出嚟，不過一陣要做訪問，所以唔方便。
林：咆咆都應該唔記得咗我。
蓋：狗仔好好記性㗎，當年係同佢一齊執返嚟嘅。
分手到而家都接近5年，唔知佢哋仲記唔記得對方嘅生日呢？
林：我梗係記得。
蓋：你唔記得囉，你最近無傳短訊俾我喎！
林：無傳就係因為唔得閒，不過我記得嘅，因為你同某君係同一日生日，所以點會唔記得呢。
咁多年嚟，對方生日當天，會唔會諗起佢？
林：記得生日，自不然就會諗起佢。
蓋：我其實記得好多人嘅生日日子，因為已經代表咗嗰個人，如果我唔記得咗嘅話，對方應該已經唔喺我心裡面。
林：好，我應承你，我會記得去做。
蓋：我提你囉，我好搞笑，會提啲好熟嘅朋友，今日我生日呀，快啲祝福我啦，有時候我係會咁樣㗎。
如果有一日，真係唔記得對方生日，會唔會提佢？
蓋：唔需要啦，因為我唔介意嘛，同埋佢已經有自己一個家庭，我唔覺得需要咁樣做，不過佢仍然係我朋友。
林：絕對係朋友，我都覺得佢好真！
那些年遇到的那個他/她，都係人生裡頭嘅部份回憶，偶爾回味吓，原來當年分手嘅遺憾，只不過係一場春雨，而家已洗去無痕。
策劃：肥A
攝錄：黃志明、蕭敬漁
蓋世寶髮型及化妝：Venus（嫁妝）
來源 source: http://nextplus.nextmedia.com
|
鍾意就快D Share啦！
|
|
|
