「咖啡妹」傅嘉莉（Kelly）出道16年，甚有長輩緣，身邊男性朋友比較成熟，早前呂慧儀及黃文廸宣佈離婚，傅嘉莉公開指當年被呂慧儀利用做新聞，被網民批評抽水，今日有周刊報道稱，她拍《極道怪咖》與同劇的高海寧傳不和，有傳傅嘉莉在拍攝時擺款扮女主角，又出動私伙名牌手袋「炫富」，每個手袋價值十幾萬，相當離地。
今日Kelly到尖沙嘴出席活動時，對於被指自封女一，她說：「成個報道睇完我覺得好委屈，因為自己真係好努力去工作、去拍劇，但係別人嘅焦點放咗喺一啲錯誤嘅畫面上，例如我嘅衫褲鞋襪袋，係公司嘅設計師搵番嚟畀我着、畀我戴嘅，全部都唔係私伙，全部係TVB嘅服飾，我亦冇擺過女一嘅架子。我入咗行咁耐，我而家將好多負面嘅嘢轉化成正面，我會諗多咗個女一稱號都好，但講真『女一』係公司畀嘅，而唔係我自己可以扮出嚟，我希望啲人注意我工作方面，而唔係其他。」
然後Kelly提到之前在IG上斥呂慧儀和黃文廸當年博宣傳，她說：「咁我明白，可能我最近喺IG為自己澄清，畀人覺得『你搞是非』，其實我只係想幫自己澄清，覺得冤屈，當時覺得自己唔識講嘢，又成日講錯嘢，所以我之前冇澄清，但我真係好唔想每次有呢啲事，就關我事，畀我一個咁差嘅名號，所以我想為自己澄清，而唔係搞是非，亦冇被其他演員藐視，我哋一齊拍戲好開心好融洽，有互相勉勵，可能觀眾睇唔到就覺得『你係咪孤獨精』、『畀人哋杯葛』，點解要咁睇呢件事，我睇完覺得好委屈。」
對於早前有報道指她有私人司機接載，Kelly勞氣地說：「其實嗰個係我親細佬，佢得閒就車我同屋企人去買嘢、行街，而唔係專人司機，我亦冇當佢係司機，我同我哥哥、細佬同屋企人好好關係，係一個好開心嘅family，我睇完都好唔開心。我細佬俾人影過好多次，但冇人知佢係我細佬，只覺得佢係司機，我呢架車係最低級型號，我供緊，細細架（車）方便我返工，但方便唔到我屋企人，買架7人車又覺得我乜嘢星級專用車，我做每樣嘢都有人用有色眼鏡、或者一個錯嘅角度望我，一路以嚟我以為唔講就會冇嘢，原來唔係，就算我而家乜都冇做，都寫咁多呢啲嘢，而家會open去講。」
她指近年負面新聞不絕，覺得不開心，又稱自己花很多時間拍劇，但被人抹煞她的努力，只是想她過去的事，她感嘆地說：「佢哋永遠諗番啲4、5年前錯誤嘅新聞，我有好多唔同年紀、唔同身形、未婚或已婚唔同種類嘅朋友，我有我嘅私人生活，都會出街同聚會，唔通我做藝人，我就唔可以同其他人去相處咩？點解啲人就會好focus『你同一個年紀大嘅人就肯定係咩喇』，我每次睇到都覺得好委屈，而我冇辦法去解釋到，因為啲人就係鍾意睇呢樣嘢，以前我唔識講係因為驚越描越黑，大家會唔會諗多咗，佢只係一個我好尊敬嘅長輩，佢教識我好多嘢，真係有嘢，就唔會咁易俾你哋影到，我只係一個small potato，唔想同朋友出去食飯，叫佢哋唔好望住我、坐過啲。」
之後Kelly還主動提到多年前被指與「肥叔叔」在的士又攬又啜（新聞連結： https://bit.ly/2TI1AGR ）事件：「可能真係巧合又或者被安排，一截完的士上車就俾人影埋，我講緊肥叔叔事件，佢嘅身形，令到我喺張相度畀人有錯覺，正常社交可能會有個friend hug，但啲人一睇『哇！肯定係咩啦』，件事本身係去食飯，佢要買禮物畀佢老婆。」
至於被指利用朋友為自己的飾物品牌宣傳，Kelly非常勞氣地說：「喺報道就話我利用佢、用盡佢，我真係覺得好難聽好難受，我唔可以有朋友嘅？我真係好用心去做，每個頭箍用幾日時間去設計，所有嘢都係我自己做，但我覺得真心支持我嘅朋友會繼續支持，唔會受呢啲扭曲嘅報道影響，我亦唔會care。」
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
3月28日 10am-11pm《MINI GAME大挑戰》
玩小遊戲隨時送你去任何地方嘅來回機票
https://bit.ly/2WigzsG
|
鍾意就快D Share啦！
|
|
|
