阿嬌金句升級舌戰辮子MC Jin
索爆人妻鍾欣潼（阿嬌）現身《我和星星有個約會》，今次的星級任務是實現「00後」男粉絲的MV夢，不過她眼前的「辮子嫩肉MC Jin」Cyrus竟緊張到呆住Rap！「舌戰」一輪後，阿嬌當堂火都嚟，將經典金句「個個都拍拖，唔通個個都想拍拖」升呢做「2.0」版本：「個個都Rap，唔通個個都識Rap咩！」
阿嬌是《我和星星有個約會》首位出動的女藝人，99年出道的她要幫男粉絲圓夢。年僅15歲的Cyrus外貌有點像MC Jin（歐陽靖），他特別喜歡阿嬌的作品《心多》，無限Loop都未能滿足到他對偶像的愛，最渴望能與心中女神置身MV中，一齊Rap一齊跳！他知道有幸近距離見到偶像騷Quali，即急Call三名女「嬌粉」撐場壯膽，阿嬌打招呼後，就示意四位忠粉上排舞室「辦正事」：「我知你哋嚟做乜嘢，跟我嚟！」
「壯膽女團」臨場縮沙
Cyrus見到偶像，明顯緊張多過興奮，阿嬌說：「一陣你跳晒呀！」他卻口窒窒：「點會我跳晒！」最搞笑是其「壯膽女團」竟齊聲說：「我哋陪o架咋，陪襯咋！」入到排舞室，阿嬌提議先重溫一次MV片段，此時Cyrus信心滿滿說：「其實個MV我睇咗好多次，都記得部分舞步o架！」更有備而來玩「變髮」，續說：「因為個MV入面嘅Dancers都係女仔嚟，不如等我戴番個假髮先。」阿嬌見狀驚呼：「你戴假髮？」見他揈出兩條小辮子，瞬間變「還珠格格」，阿嬌掩嘴大笑，並大讚：「幾好喎……幾靚吖！」
急召排舞師特訓
當眾人都以為Cyrus有點睇頭，不過音樂響起要跳舞時，他只輕扭兩下，雙手伸懶腰咁款擺幾下，睇到阿嬌眼凸凸，想到他揚言夢想是拍此曲MV卻又不熟舞步，難怪女神都有火：「你呢啲咩嚟o架？又要提出要求，又唔識跳！」不過錫Fans的她又點會真心嬲，隨即就傳授獨門「扭腰趷籮」招式，並把隔籬練舞室的排舞師Rock捉過來替他上「速成班」。
經過一輪又一輪的練習，阿嬌覺得Cyrus是時候再Solo，Cyrus再次頭頂冒汗，但仍然頂硬上Show Time！可惜似乎愈急愈亂，竟將剛剛學完的舞步忘記得一乾二淨！見他面有難色，阿嬌都心痛，即上前拍拍他的膊頭安慰：「好喇，就咁啦，你盡咗力o架喇！」堅持完成目標的Cyrus耗盡最後勇氣，誓要在偶像面前Rap一次，即MC Jin上身Rap住唱：「我知道頭先我自己跳舞唔係幾好睇……」一口氣Rap完，阿嬌即時送「叻叻」稱讚！
粉絲的話
你好，我想同嬌嬌有個約會，可能我冇一個感人肺腑嘅故事，但係我一直都有個心願，就係同阿嬌一齊夾番首《心多》。我記得細個睇過一個MV，嗰句「MC Jin rockin with Gill」真係好型，加上我一向都有聽開Hip Hop，想試吓同嬌嬌拍番首《心多》MV，或者同嬌嬌一齊Rap。好我唔貪心啦，希望我可以被揀中啦，Thank You！
Cyrus
髮型：Wil Tam@Fifth Salon
化妝：Lily Lam@Ndnco
場地：Studiodanz
|
鍾意就快D Share啦！
|
|
|