美國總統特朗普（Donald Trump）跟粵劇風馬牛不相及，但經過李居明妙筆下就創作出新劇目《粵劇特朗普》，李居明不但安排特朗普跟毛澤東和金正恩在新光見面，還為特朗普創作了一個流落中國、失散了的孿生兄弟川普，他們之間千絲萬縷的關係，將為戲迷帶來連串驚喜。李居明連番推動粵劇新浪潮，只是本着「粵劇唔好死」，更笑謂這套劇若不幸惹怒特朗普，他將一夜之間舉世知名。
撰文：比華利
攝影：沈健程
相關新聞：龍貫天粵劇功架啱特朗普誇張動作
粵劇近年隨着時代進步了，尤其風水師李居明創作了新派劇目，掀起一股粵劇新浪潮，當中除保留粵劇傳統風格，還會加入新元素。在16年李居明大膽創作粵劇《毛澤東之虛雲三夢》，無懼政治壓力，把這位具爭議性的近代政治人物搬上北角新光大舞台，出來效果不錯，該戲兩年間三度公演。食髓知味，李居明最近斥資二百萬創作了《毛澤東之虛雲三夢》Part 2《粵劇特朗普》，內容提到現任美國總統特朗普遇上毛澤東。
《東方紅》英文版
李居明日前接受《蘋果》專訪，他解釋為何揀中特朗普：「特朗普當選總統後，中美貿易戰好影響我哋生活，通過佢身上故事，可以帶出一啲訊息。呢套戲串埋毛澤東，看似風馬牛不相及嘅兩人，又涉及兩代，我靈機一觸諗番奧巴馬（Barack Obama）都有個兄弟喺深圳開燒烤場，啟發我幫特朗普搵個孿生兄弟川普。」
李居明有心思地把敏感的政治人物混為一談：「成套戲結合中國近代史，除有特朗普、金正恩同中美貿易戰，戲中仲大膽反映文革，有段係劉少奇死前對政治睇法，講番自己委屈，又有毛主席用英文唱出《東方紅》，又有金正恩夫妻生活，特朗普同女兒關係。」李居明平常心撰寫特朗普，沒有美化，也沒有醜化，他由網絡搜集其資料重新整理拼合：「一定唔係搞笑 ，我係想通過古仔表達現實，包括父子情同夫妻愛，政治敏感嘢基本可以唔寫就唔寫，咁敏感題材喺粵劇表現出嚟唔會有好嘅反應，我會滲入金正恩見特朗普，唔係講政局，原來煮個芝士火鍋畀特朗普食，特朗普三餐都叫外賣，每日飲十二支可樂，白宮又係十大鬼屋，呢啲內容都有趣。」
相關新聞：26歲特朗普搵細佬
起用一生三旦
撰寫特朗普未有太大壓力，李居明說：「我係小人物，相信咁大嘅政治家，絕對唔會同我過唔去，我哋唔好將自己放得太大，呢套只係嬉笑怒罵戲劇箒，佢哋唔會告我，唔會郁我，如果佢真係咁小器郁我哋，咁我就賺咗，一夜之間舉世知名，我相信自己冇呢個運。」
傳統粵劇是一生一旦，但《粵劇特朗普》卻有一生三旦，老倌龍貫天一人分飾毛澤東、特朗普及川普，三旦分別是扮江青的陳咏儀、扮金正恩妻子李雪主的鄧美玲及扮周恩來妻子鄧穎超的王超群。李居明指老倌們仍會「唱念做打」的粵劇功架。李居明本想安排鄧小平出場，無奈未有合適人選，角色懸空。不過李居明卻預告劇中有特首林鄭月娥背影：「我心目中覺得阿姐（汪明荃）可以演到，但佢礙於人大身份唔方便演。」這戲已吸引外國媒體關注，公演時更會配上中英文字幕，方便外籍觀眾入場欣賞。李居明更自爆一位認識特朗普的友人，屆時會邀對方來新光欣賞演出，友人若喜歡還會把該戲介紹給正版特朗普。
改變粵劇氣氛
李居明15年底扑槌承租新光，更斥資八位數字大搞粵劇，目的想推動粵劇，希望延續這個本土文化。李居明說：「仲未填好個氹，如果填好，一早畀其他財團推我走，佢哋直入新光啦，冇人爭，證明新光真係一個蝕本生意。」新光最初只續租四年，至今已續租第七年，李居明成功游說業主可以租到2022年。
無可否認李居明推動粵劇是出錢出力，李居明說：「以前粵劇係唔肯落廣告，我係會落本打廣告，令大家感覺好似粵劇翻生，其實我都係為粵劇出一分力，希望佢唔好死，我睇粵劇長大，希望可以延續，令香港這個本土文化唔好死亡。」同時又推動粵劇新浪潮，「我想喺粵劇方面逐步加入新元素，慢慢改埋粵劇氣氛同制度，我希望未來60年，粵劇都仲會興旺。」
場地提供：新光戲院
|
鍾意就快D Share啦！
|
|
|
