近日有傳安祖蓮娜想同畢佬復合先鬧出連番是非影響離婚程序！
荷里活影星安祖蓮娜祖莉（Angelina Jolie）與「畢佬」畢彼特（Brad Pitt）於2016年驚爆婚變，為爭6個仔女撫養權打官司打足兩年多，雙方律師團更多次出手揭對方臭史，是非連連，正當大家以為畢安反目成仇之際，近日就有指安祖蓮娜多次刁難畢佬以及打拉鋸戰，竟然係因為有心與對方復合？
有報道指安祖蓮娜申請離婚之後，於離婚程序中百般刁難畢佬，其實係因為改變心意，唔想快手完成離婚，反而想挽回對方嘅心。知情人士近日爆料指：「安祖蓮娜已經同畢佬講清楚，佢想同男方一齊番，希望大家再次做一家人……正因為咁，佢先處處搞到佢兩個單離婚官司咁麻煩。」
不過有傳畢佬就唔領情，拒絕復合要求，僅表示希望為仔女而與女方維持友好關係，據悉畢佬於婚變後最緊張就係仔女，所以一直相當低調以及就此封嘴，未有考慮與安祖蓮娜復合，知情者又指：「畢佬只係想快快解決所有事，講真，成年前就應該搞掂，只係佢（安祖蓮娜）唔放手！」
來源 source: http://hk.on.cc
|
鍾意就快D Share啦！
|
|
|
