喺台灣生活咗11年，嫁埋台灣老公，入咗台灣籍嘅蔣雅文，近期返香港搞攝影展。
呢11年，佢話自己做咗人哋雙倍嘅嘢，不過因為係自己選擇嘅，佢做得開心。亦因為當初佢好狠咁自斷後路，同英皇解約，去台灣重新開始，佢由一個「三冇」港女，變成有兩間舖頭、有老公，仲接埋爸爸媽媽去台灣生活。佢話依家唔能夠講係完美，但佢覺得滿足。
蔣雅文離開香港嗰陣，冇男朋友、冇樓、冇錢。依家？物質上唔算好豐富，形象指導老公唔富有，亦冇樓揸手，但佢哋結婚5年仍然好sweet。
佢話賺台幣，每次返香港用錢好似俾刀割咁。不過有啲嘢唔可以用錢嚟衡量嘅，例如佢依家有三間舖，喺台北同花蓮兩間舖主要賣甜品，花蓮嗰間由佢爸爸打理。喺台北仲有一間workshop，有時裝賣嘅。
以前佢乜嘢都想自己做，依家學識交畀員工處理。佢可以隨時返香港玩，呢日就同細妹孖住去睇戲。
空出嚟嘅時間，佢可以做番自己鍾意嘅嘢，例如攝影，今次影展都係佢自己搵場地同各樣贊助。
其實當初佢去到台灣，做過派傳單、喺便當店洗菜、斬雞，亦做過送外賣，同埋室內設計學徒。
當時做呢啲工作，其實好難維持生活，佢唔想父母擔心，每個月仲喺積蓄度拎d出嚟畀家用，所以自己就要好慳。
佢話當時窮到爆、窮到癲，會趁麵包店臨收舖，去買一大包特價麵包返嚟，雪入冰格，每日叮熱食，食麵包食咗好一段時間。佢話唔想衰畀人睇，咁就捱過咗。
佢覺得重頭開始唔係年輕人專利，最緊要唔好驚失敗，你願意行出嗰一步，有好多可能性喺後面等住你，連嗰步都唔敢行，你就拒絕咗所有可能。
佢喺台灣不但賺到事業同婚姻，最重要係搵番自己嘅價值，有自信嘅女人，36歲仍然有吸引力。
來源 source: http://nextplus.nextmedia.com
|
鍾意就快D Share啦！
|
|
|
