唔係個個名人、公眾人物都可以好似發哥咁貼地，出入下下搭地鐵。畢竟有司機自我感覺會良好啲，無都要唔緊要可以自己揸車，再唔係就搭Uber、的士，總好過搭公共交通同人逼好似降咗level咁。所以，估唔到喺地鐵車廂入面，竟然見到前亞視執行董事盛品儒，有啲意外。
雖然喺香港養一個小朋友開支係幾百萬上落，而盛品儒仲要龍鳳胎打孖上，一定使唔少錢。不過，相信對佢同老婆蔡一鳳嚟講，小朋友開支只係小數目，未至於為慳奶粉錢要搭公共交通工具，何況呢日所見，盛品儒連八達通都無，要去售票機買飛，明顯唔係經常搭港鐵。
不過，唔常搭唔等於唔識搭，盛品儒準備好晒銀仔，撳機買飛無難度，就連而家改到勁麻煩嘅出入閘方式──入閘嘟卡出閘插卡，佢都順利完成，成功上埋車搵個靚位企定定玩電話。
講到識買飛搭地鐵好神奇咁，其實基本到不得了，你估個個都好似777咁，想搭地鐵做親民show，但連嘟卡入閘都唔識咁蝦碌咩。
來源 source: http://nextplus.nextmedia.com
|
鍾意就快D Share啦！
|
|
|
