無綫近年「鬧兵荒」，不少小生花旦，甚至資深演員都相繼離巢。繼日前劉兆銘爆出「不被尊重」不續約一年一騷，連「御用奸人」戴志偉，早前接受《蘋果》訪問，也大嘆被無綫冷待，拒簽一年一騷轉行做保險。他直言自己蝕底在不懂得擦鞋，但卻問心無愧。
採訪：嵐山
攝影：沈健程
相關新聞：【蘋聞重溫】《鹿鼎記》同偉仔爭商天娥
現年58歲的戴志偉曾是無綫「御用奸人」，好似《新紮師兄》的張家明、《鹿鼎記》的鄭克塽、《創世紀》的許文坤等，每個角色都奸到出汁。但現實是，黑黑實實的戴志偉，無論何時都西裝筆挺，說話聲線溫柔，完全不似鏡頭前的大奸角。
其實，近年戴志偉的角色也不盡是奸角，早前拍港台劇《運輸背後》過戲癮，飾演運輸署助理署長，對於港台節目去年上半年平均收視率僅0.1點（約6,400名觀眾），他顯然不介意，反而欣賞幕後人員的付出，他說：「拍攝時間鬆動啲，所有製作人員一流，我覺得好有誠意。不過，有一點高層應該關注，做演藝事業嘅人唔係做義工，嚟到都要畀餐飯佢食，我覺得自己似外判清潔工人，飯盒都冇，冇車接去拍攝場地，又唔夠化妝師，人工更加唔使講。」
| | |
與華仔家輝同屆
講起錢就敏感，原來戴志偉在保險界也甚有名氣，99年已投身保險業的他，試過九次達成MDRT（百萬圓桌會）指標，2011年拍完劇集《天與地》後，轉做保險長工更成為分區高級經理。戴志偉笑說年輕時從來沒有想過入娛樂圈：「一直覺得自己好醜，兜風耳點做？我以前喺政府水務局做抄錶員，有日行街被星探發掘，第一部戲叫《老虎魚蝦蟹》，之後公司執咗，我就變雙失。好彩自己都有幾張刀，拎住結他去民歌餐廳唱歌，收入都唔錯。」
很懂得為未來打算的戴志偉，當年已覺得唱民歌只是賺快錢，81年加入無綫藝員訓練班，同期有影帝劉德華、梁家輝等，戴志偉說：「其實我初出道，拍《過山車》已經同黃日華、戚美珍一齊做主角。之後遇到張家明呢個角色，其實睇劇本唔係惡人，俾環境逼上不歸路，嗰套戲幾proud，作為一個新人做得唔錯。記得一場我喺天台嘅自殺戲，同梁朝偉做對手，我一個人講六頁紙，兩take，第一take已OK，第二take係備用，由冷靜變失控，將一生對梁朝偉嘅唔滿意講晒出嚟，嗰場戲佢哋（藝訓班同學）拎嚟考試。」
賣樓套現度難關
即使戴志偉再好戲，但角色越來越沒有發揮，最後更被要求簽一年一騷，他在2011年決定不續約。問到可有羨慕華仔、家輝？戴志偉說：「自己睇得好開，每個人際遇唔同，自己都有弱點，唔識叩門、唔識擦鞋打交道，係蝕底，但問心無愧。」戴志偉感嘆不能指望TVB人工「養到你」，90年代已一邊拍劇、一邊做地產。他說：「97金融風暴都有影響，但受得住，好彩唔太貪心。」當年他賣掉自住的西貢二千幾呎豪宅及三千呎花園，他說：「現在係天文數字喇，但我睇得開，從來冇問人借錢，賣咗最心愛嗰層樓，套現過難關，之後樓市跌再買番。」
今時今日，戴志偉可說生活無憂，與太太感情恩愛，兩個兒子大學畢業已投身社會。他說：「太太就唔多講喇，向來低調。」沒有花邊新聞？他說：「自己唔鍾意新嘢，相處咁耐唔諗咁多。𠵱家幾舒服，得閒去旅行、打golf、跑步、踢足球，仲會同班朋友開演唱會，上年都喺荃灣大會堂搞咗兩場，好享受。」
場地提供：Harlan's（The ONE）
|
鍾意就快D Share啦！
|
|
|
