馬上成為壹會員
會員專區 只限會員閱讀
處境劇《愛‧回家之開心速遞》，最近成功捧出一隊耆英組合「大四喜」，憑住佢地嘅rap歌《IG》，rap出一條血路，網民like爆，強烈要求佢地攞今年樂壇新人獎。
四個加埋二百幾歲嘅耆英，並唔係普通嘅甘草演員，年輕時佢地都有啲料到。
先講「馬豹」黎彼得，佢係香港七十年代詞壇鼎足而立嘅四大猛將之一，綽號「鬼馬填詞人」。當年佢同歌神許冠傑合作無間，膾炙人口嘅神級之作有歌神嘅《賣身契》同《加價熱潮》，歌詞好貼地。
轉數快嘅佢，之後俾大台高層拉攏加入《歡樂今宵》度劇本，但黎小田搵佢復出，幫張國榮填咗首經典作《Monica》，仲有梅艷芳嘅《將冰山劈開》，之後填詞界新人冒起，佢又淡出詞壇轉戰拍戲，將搞笑嘅鬼才發揮喺演技之上。
至於主角「熊樹根」丹爺，現實中最為人熟識，係身份為劉凱威老豆。
丹爺70年代已經加入影壇，不過一直鬱鬱不得志，撈過嘅電視台有亞視前身麗的，佳視，之後跳去無綫。一套「強人」同「上海灘」，令劉丹憑奸角彈起。之後「真情」叉燒炳，將佢由無綫御用奸人變慈父專業戶。早幾年佢亦做過西貢區議員，為民請命。
大四喜另一成員，「龍敢威」羅樂林，曾經係男一之外，仲係香港第一代《神鵰俠女》嘅楊過。雖然之後由男一退到做男二，甚至係配角，不過羅樂林一樣演得投入，喺大台神劇《大時代》做股神，傳授「股票必勝法」俾劉青雲，角色令人難忘。佢亦係《鐵探》中演伍Sir嘅陳志健真‧外父。
至於一頭白髮嘅「譚道德」陳榮峻，做龍虎武師出身，80年代轉行揸的士，一次由皇室堡接載黃霑返大坑寓所，就係呢段車程，改變佢人生，經黃霑引薦入無綫藝員訓練班，早期佢憑住高高瘦瘦身型，演嘅都係風度翩翩嘅公子。
不過星途嘅嘢，需要天時地利人和，配合唔到，陳榮峻都冇放棄演藝事業，寧願一邊做散工，揸的士、揸小巴，做導遊，一邊拍劇，過戲癮。
立即下載APP，精彩內容壹手掌握
如對會員訂閱制遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
