早前播完嘅網劇《PTU機動部隊》，劇中見到好多久未於港劇露面嘅演員，其中一位係飾演黑幫Panda嘅張錦程。張錦程先後效力過無綫、亞視、有線，係早期北上發展嘅藝人，令人印象深刻嘅，除咗佢扮祥嫂，就係佢娶咗個索老婆張延。唔知張錦程自己有冇數過自己有幾多年冇拍過港劇！佢話：「香港劇就真係好耐，如果計喺香港拍劇，都真係有十幾年。二千年同TVB合約完咗之後，就返咗國內，喺香港只係演吓舞台劇。」想當年，唔知佢離開TVB最大原因係咩？「當時係二千年之前，我二千年返國內拍劇，因為見到再有戲做嘅空間唔多，同埋累積咗好多問題，當時有輕輕提議過，力捧後生仔或者其他人，公司一定係咁樣，因為有年青觀眾，所以力捧年青人，一定有呢個空間，但要有一個計劃。有時候你見到無論當選港姐、港男嘅，我見到佢哋嘅培訓好少，變咗培訓少而又要力谷佢哋嘅時候，喺拍攝時佢哋都無時間消化，導演亦都拍得辛苦，佢哋嘅budget又低，變咗經常唔夠時間。呢一行嘅產品其實需要時間，但點樣可以令佢合理地，而時間又可以充裕利用呢？」覺得無綫制度有咩問題呀？「你會喺TVB見到一啲有天份，因為公司可能睇佢嘅條件，係咪比較靚仔靚女，或者其他原因而會優先啲。有啲你會見到係無機會嘅，香港就係咁樣，就算國內都唔係咁樣，美國都唔會咁樣，佢哋會睇市場需要咩嘢人，所以我話制度上要改變，點樣可以公平試鏡，佢哋唔會特別有咩試鏡，都係合作過比較熟，或者上一套戲演得唔錯，就會搵你，但其實會抹殺咗一啲驚喜，某一啲有心演戲嘅人，慢慢會喺TVB消失。」咁認為佢哋可以作出改變嗎？「其實我覺得唔難去改變，問題係當權人肯唔肯改變。如果當權人肯改變嘅話，其實自然就會比較美好，我明白當權人有咩困難，但其實嗰啲困難唔係無辦法解決嘅，只不過佢哋習慣咗，或者去到嗰啲位置，佢哋就會盲咗、忘記咗，或者覺得唔重要。好多時佢哋覺得觀眾民智比較低，你引導得好好，就餵啲豬餿畀佢哋食啦。其實唔係嘅，都可以有啲好嘢嘅。」
眾所周知，張錦程有個靚老婆張延，結婚15年，點維繫感情？佢聽到笑晒口咁答，「其實互相都習慣對方工作時間，其實就係當可以一齊嘅時候，就多啲陪對方，質素好啲，我哋好早已經習咗唔係朝九晚五，所以對我哋嚟講都無咩特別。反而可能因為大家需要周圍飛，自己嘅空間都會多咗，喺某啲時候嗌交都會少啲。」咁老婆最欣賞佢啲咩呢？「老婆應該最嬲同最欣賞都係同一樣嘢，就係比較直接，我個人都係有嗰句講嗰句，以事論事。我諗佢最唔鍾意就係我唔係好識氹人，我諗好多女人都唔會鍾意一啲唔係好識氹對方嘅人。講笑嗰種我就梗係識啦，但有時候唔係吓吓都咁好笑嘛，都有一啲自己沉思嘅時間，我諗佢而家都係慢慢習慣緊我啲沉思時候，唔好講咁多嘢。」張錦程同張延只有一個女，唔知似邊個多啲呢？「女仔樣梗係似我老婆好啲啦，性格就兩個都有啦，因為我哋生㗎嘛，做父母嘅就盡量俾多啲空間佢囉，因為而家香港整個教育制度，都係扼殺緊一啲小朋友成長嘅時間，例如玩耍時間、身體鍛練時間、去接觸其他事物嘅時間，佢哋好多時都只係從網上得到知識，所以我哋做父母嘅，盡可能等佢哋有多啲時間去探索其他事情就會比較好。」
攝錄：黃志明
立即下載APP，精彩內容壹手掌握
下載連結： http://bit.ly/Next29App如對會員訂閱制有遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
