羅仲謙和楊怡在香港情定拍劇，至今結婚三年多，男方近年奔走內地搵錢養家，夫妻雖然經常分隔異地，但時常都會在網上放閃晒恩愛，生B大計婚後講足三年，奈何二人因各有工作發展難以合體，近日阿謙鐵定返港停留，決心陪伴太太左右，努力造人建立家庭，阿怡減產配合阿謙做運動，隨時有好消息分享。
阿謙近日為導盲犬電影《小Q》宣傳，戲中他飾演導盲犬訓練員，遇上演視障人仕任達華和犬隻相處的感人故事。為了表現更專業，開拍前阿謙要到導盲犬協會接受特訓，由旁觀者到親自訓練犬隻，再接觸寄養家庭，每個步驟都好深刻，希望令社會理解導盲犬存在及少些拒絕事件發生。人狗合一演戲難以掌握，另一方面阿謙和前輩任達華戲份最多，作為訓練專員面對抗拒導盲犬的華哥，要硬食對方不少暴躁脾氣，場面入骨。
阿謙一直視華哥為心目中偶像，出道時第一套電影《阿嫂》已遇上華哥，但當時戲份不多，今次才有機會正面接觸演對手戲，既開心又沒壓力，阿謙說：「華哥都可能唔記得咗我，我唔係新人，入行十幾年，而且華哥唔會畀壓力周邊人，大家為件事，唔會因為後輩而恰你，係好前輩好榜樣。」華哥是大眾心目中型男，阿謙同樣被這份濃厚魅力吸引，他說：「個人Keep得好，家庭美滿，事業得意，感覺上事業有成，又冇爭名逐利之心，唔覺得佢係乜都要贏人，你話幾難拿捏，到我有華哥6、7成都好開心。」
在內地發展多年，雖然阿謙和楊怡婚姻穩定，但為工作聚少離多，要維繫感情大家有所付出，阿謙自認非浪漫男：「太太係好成熟女性，當然有詐嬌時候，但自己要識做，我一啲都唔浪漫，追佢時就浪漫，而家兩夫妻冇以前咁刻骨銘心，兩公婆婚姻冇100分完滿，一定有高低潮，大家明白呢個道理就唔會專登去追求完美，唔畀對方壓力係最舒服關係。」
阿謙為太太為家庭心繫香港，近月會返港停留拍劇兼造人，他說：「一直冇話將重心放內地定香港，有機會就去做，對我嚟講冇得選擇咁多，華哥呢啲級數就可以選擇啫，我呢啲叫拼博中。」經過近年積極搏殺，阿謙在內地巿場算站穩陣腳，但他坦言：「始終唔可以離家太遠，同埋一直同太太計劃生小朋友，但一直只計劃，冇實行，今次專登安排返香港工作，可以實行計劃，一箭雙鵰，已經三年冇拍港劇，同太太有共識做呢件事。」楊怡一直渴望生BB，今次阿謙公開呼應造人，並透露太太近期只接拍輕量工作，大家已經隨時準備狀態，阿謙笑說：「呢排佢會留喺屋企做吓運動，上網購物。」
採訪：卓寶花
攝影：陳俊強
DV片段：葉君海
化妝：Leo Tam@ Annie G Chan
髮型：Jan Chiu@PP IL Colpo
場地提供：Studio King影樓王
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
|
鍾意就快D Share啦！
|
|
|
