已經退出補習界、曾經頗有名氣的英文補習導師范浩揚（K.Oten）近年是非多多，與前僱主對簿公堂後，最終因為未能償還賠款破產收場；曾經在事業上助他不少的前妻吳嘉欣（Cher），亦因為背負二人分開前開設的多間公司債務，現在揹上一身債，早前在社交網與友人狂呻，更以「賤男系列」為題貼文，指K.Oten不肯歸還公司名下車輛，最後報警才能解決。
現年37歲的Cher和K.Oten於06年結婚，育有分別8歲及6歲的兒子；雖然二人於2010年辦理離婚手續，惟當時未有正式分開，關係至去年才結束。Cher日前於新界住所接受《蘋果》訪問，愁爆表示目前為前夫揹債數百萬：「淨係欠稅局嘅稅都200幾300萬，仲有幾間公司嘅錢，因為當時佢（K.Oten）破咗產，所以啲公司用咗我個名，啲債就係咁嚟。」
早前Cher在社交網貼文，指前夫拿走了公司名下的車不肯交還，最後報警求助才成功取回。重提這事，Cher仍十分勞氣：「車攞番之後，發現有9張罰單，有啲本來$320，但加到$1080佢都唔交，有啲甚至要上庭添！」面對前夫欠債後「走佬」，又要照顧兩個兒子，Cher自言心力交瘁，她說：「其實以前我都有理公司啲數，但幾年前開始將時間都放喺屋企度，公司嘅嘢都由佢處理，唔知佢原來做咗好多嘢，o氹咗好多人投資入公司，有8位數字，因為條數靚，銀行又肯借大額畀佢，啲數有啲係我私人擔保，有啲係公司同事擔保，所以有兩個同事都揹咗好多債。」
問Cher可有嘗試聯絡前夫K.Oten？她更感無奈，「佢block晒我，最後一次見佢大約2個幾月前，佢仲同兩個仔講，話今次係最後一次見爸爸，話佢要去好遠嘅地方做嘢，以後唔會見到佢。」Cher續說：「而家其實冇咩可以做到，只可以向前行，有兩個小朋友要照顧，係唔可以掉低佢哋。其實大仔都有自己上網查，佢見到爸爸唔好嘅新聞，我都有同佢哋講，爸爸欠人好多錢，走咗唔會返嚟。」
Cher表示，現在要保持正能量，不想影響兒子情緒，但面對最大問題一定是龐大開支，「好彩我早年考咗保險牌，所以而家除咗做model工作，仲會做保險，有時又會開live做節目，一定要勤力啲，唔可以靠單一收入。」
Cher坦言，不少朋友都問她是否要為兩個讀國際學校的兒子轉校，減低生活開支？但Cher堅持以不改變小朋友生活為首要。她說：「佢哋唔識中文，亦好難適應到傳統學校嘅節奏，我見到佢哋放學返嚟好開心，而且如果讀傳統學校，我更加做唔到咁多份工，因為佢哋而家唔使做功課，我先至可以做咁多份工。」
Cher承認現在是兩個兒子給她動力，一切都為了他們，「如果唔係佢哋，自己可能買張機票一走了之，但生得佢哋出嚟就要負責任。但我呢幾個星期都睇化咗好多，有諗過真係還唔到，大不了就破產，我覺得睇吓自己睇唔睇得通嘅啫，如果一定要求物質會辛苦，但如果做到無錢就食少啲，衫買少啲就ok，或者呢啲係因果，我前世欠咗佢，今世要還，咁諗會令自己舒服啲，嬲都無用。」
本來家醜不出外傳，但Cher指她願意將事件來龍去脈講出來，因為得悉前夫仍不斷向身邊人借錢，故她希望呼籲所有人，不要再借錢給他。問Cher是否覺得當年自己好蠢？她苦笑謂：「一定係！佢仲驚你唔死，踩多你幾腳，好似最近佢為咗撇清自己係公司老闆嘅身份，竟然去小額錢債追欠薪，話公司欠佢幾萬蚊，但其實以前公司嘅人，個個都知道佢先係真正嘅老闆。」
採訪：鄉奈仁
攝影：仇志德
影片：廖達燊
-----------------------------
7月4日起 《蘋果動新聞》只限升級壹會員閱覽
繼續撐蘋果！
|
鍾意就快D Share啦！
|
|
|