【TVB黑仔王】台慶綵排遇飛來橫禍 張振朗：我頂得住
隨著電視劇《牛下女高音》畀無線放行，仲做埋台慶劇，張振朗辛辛苦苦拍出嚟嘅作品唔使做倉底貨，兼且收視有26點，叫好叫座，張振朗梗係開心，仲諗住終於可以摵走「地獄黑仔王」封號，點知人算不如天算，諗都諗唔到昨日綵排無線台慶《珍惜香港發放娛樂TVB52年》時又「中獎」，其中一部吊臂錄影機從天而降，傳聞意外撞向張振朗頭部和另外一位無線訓練班學生，受傷一刻嚇親在場所有人，無線即安排二人送院檢查傷勢，好彩只傷及肩膊，且冇斷骨，傷勢不大，回家休息後今日繼續開工。張振朗接受本報記者訪問時報平安，他語帶輕鬆說：「唔使擔心，多謝關心，無撞到個頭講得咁誇張嘅，撞到個膊頭啫，所以頂得順嘅。」
32歲張振朗係容易受傷的男人，早於2017年出席平安夜活動時遇飛來橫禍，在屯門被商場天台飛落街的大型帳篷擊傷腰同膝頭，搞到要做物理治療，之後撐枴杖負傷拍攝《包青天》，而拍攝期間也曾墮馬。另他主演的多個劇集受「安心事件」主角黃心穎所累成為倉底貨，劇集《機場特警》受社運影響還未出街。
來源 source: http://hd.stheadline.com
|
鍾意就快D Share啦！
|
|
|
