【頭條獨家】做足34年男主角 張兆輝勉勵年青人唔好太計較
TVB經典60集長劇《黃金十年》係張兆輝第二部擔正男一的劇集，相隔34年，新劇《黃金有罪》仍然係輝哥做男主角。劇中輝哥有好多動作鏡頭，同黃智賢(阿Ben)、蕭正楠及吳岱融等打到飛起，又要演繹多面人格，真係好考演技。對於做足34年男主角，輝哥奉勸年青人唔好怕辛苦同埋斤斤計較，因為當年前輩教落：「當你努力過，便會有回報！做人最緊要唔好同人比較，知足常樂，做好自己。」採訪：方騫平 服裝：Giorgio Armani 化妝：雷淑賢
張兆輝憑電影《催眠．裁決》先後獲《2019國影年度表彰盛典》「最優秀電影男演員獎項」及《第11屆澳門國際電影節》「最佳男配角」，演技受肯定，不過，喺TVB新劇《黃金有罪》中飾演嘅榮木桐，利用唔同手段達成目的，對輝哥來說都係一個挑戰，連監製王心慰都讚他發揮到角色嘅性格。他說：「角色亦正亦邪係有好大發揮，因為唔係我本身性格，今次可以過足戲癮。但接咗先發現有好多動作場面，好似泰國外景咁，要營救爸爸，搶錢救朋友等，又要同阿Ben、蕭正楠搏鬥，哈！打阿Ben好有樂趣，可以憑經驗真打，打到道具棍都斷埋。」
努力Keep住狀態
提到同黃金劇名好有緣，當年憑第二部擔正做男一嘅《黃金十年》爆紅，輝哥笑說：「嗰套劇係講年青人初出茅廬，𠵱家演事業有成，出人頭地嘅股壇大亨，感覺好似成長咗，前後呼應咁。(當年拍檔劉嘉玲、張衛健都仲係做緊主角喎！)有咁嘅成績，大家都得來不易，都要keep住最佳狀態，但奉勸年青人，唔好斤斤計較，努力做好件事，享受咗過程先，正如前輩話齋：『當你努力過，自會有回報，但唔好心急。』因為冇人知將來會點。」
來源 source: http://hd.stheadline.com
|
鍾意就快D Share啦！
|
|
|
