貢獻世界做好人
去年7月，52歲黃澤鋒的女兒小黃妃(黃熙恩)出世，太太陳麗麗52歲。
這個週日，首次跟女兒共度第一個父親節，黃澤鋒很想跟女兒說：「將來係咪有錢唔重要，最緊要做一個好人。好人係會蝕底，但好想阿女有呢個心態，因為咁樣做人，將來會有好多朋友、同學，發展會更好。縱使有一日，我同太太離開咗，我帶佢嚟呢個世界做一個好人，算係貢獻返畀個社會。」
- 黃澤鋒說，他跟太太已經有共識，在女兒面前，他是黃飛鴻，太太是石堅。
- 訪問中途，想起父親40多歲離開，他忍不住哭了。
- 他現在回想父親對他講過的話，才明白箇中感受。
- 去年7月，太太為他誕下小黃妃，之後因血壓狂飆要入ICU。
- 太太是泰拳教練，生小黃妃後，已經成全職主婦照顧一頭家。
不像一般20多歲父母
一年多前，太太高齡懷孕，公開喜訊後，備受不少抨擊，期間因荷爾蒙變化，太太身體出現濕疹等不同狀況。如試過有天不停狂咳下體流血，原來是爆微絲血管。到生產時，本來手術只需45分鐘完成，突然妊娠毒血爆發，血壓飆升要馬上全身麻醉分娩，到女兒出世了，太太被送入ICU。這一切事情都令黃澤鋒感受至深，感激太太生女「搵命搏」。「我哋年紀好大至生佢，已經五十幾歲，其實坦白講，我哋會諗好多好多問題，要預備好多嘢，因為同普通二十幾歲家長唔同，佢哋唔會諗有一日照顧唔到佢，所以我係咪應該早早做定一啲準備。」黃澤鋒想強調，從小要教她做人正確心態，因為長大後難以扭轉。他說要小黃妃快樂成長，同時也要做個好人。
- 他說現在打三份工，因太掛念女兒，很多時會攝時間回家爭取見面。
- 黃澤鋒形象健康，當年跟鄭伊健合作過勵志片。
- 離開大台，他也在其他電視台拍劇集。
- 他說自己是出名魔鬼教練，對學生嚴格兼要求十分高。
- 他說女兒聰明，知道他不會打不會鬧，所以並不怕他。
女兒20歲.我70歲
從未想過51歲才有女兒，黃澤鋒坦承會對小黃妃溺愛：「我今年五十幾歲，到女兒二十歲時，我已經七十幾歲，所以會盡力對佢更好，亦會盡力去教佢，希望生個小朋友出嚟遺害社會，我覺得如果咁樣好難辭其咎。我擔自己睇唔到，佢三十歲時，我已經八十幾歲，所以要早啲教佢。」黃澤鋒在家排行最小，有一個哥哥和姐姐，爸爸最疼他，幾歲開始，一直訓練他成為游泳健將，8歳拿了學界冠軍，稱霸九龍區。他十六歲，爸爸癌病復發，對抗病魔的最後一年，一直在家，也是兩父子相處最多的時間。「當時哥哥同家姐已經出外工作，我返緊學，對佢時間比較多，我覺得佢盡量希望喺嗰段日子，可以講到幾多畀我聽就盡量講，因為之後再無機會。」黃澤鋒說爸爸離開三十多年，十年前才沒有在夢中見到他。
他說在夢中見到的爸爸，每次都以不同年齡出現：「我好掛住佢，一講就喊，好似發生係噚日嘅事。今日我有小朋友，會明白小時候爸爸同我講嘅話，做父母嘅都會緊張自己小朋友。你係父母就會明白，會好牽掛將來佢會點。爸爸喺我16歲時離開，我相信佢會諗我將來會點？因為睇唔到我長大。成為父母，就會明白爸爸離世前嗰種感覺，我覺得好難過。我而家都會掛住個女，特登喺教游水空檔返去睇佢，點辛苦都會返去睇佢，你諗吓我爸爸當年都好難過....養子方知父母恩，我而家係完全明白，係會牽腸掛肚。如果我知道自己有機會要離開，我諗我會比爸爸更崩潰。」
打三份工給她最好
黃澤鋒為要太太安心，好好在家照顧女兒，他一直打三份工，拍戲、教泰拳和游水。每天工作七小時，做游水教練，既要暴曬在太陽下，又要落水看守學生，他們行內有術語形容為「黑海浮屍」，因為要長時間浸在水，全身經常腫脹。但他從來不覺辛苦有壓力，只為要給家人最好。「我以前好大膽，唔怕失敗，覺得最差都係變零，但而家唔同，咩都會諗清楚，我而家變零，咁阿女點算？大家唔使食？」他曾經認為兒女是天生天養，但這個想法當然已經完全改變。
活到100歲看着她成長
只有11個月大的小黃妃，確令黃澤鋒生活多了樂趣，如女兒喜歡吃東西，連苦瓜也吃得津津有味，這已逗得黃澤鋒很開心；又小黃妃有啜手指習慣，他會推給太太做惡人，不會叫她停止。他電話相簿中充滿了女兒相片和視頻，有時間便拿出來看。現在一家三口坐在一起食飯，他說就像小時候，一家五口坐在長餐枱吃飯，那時爸爸坐在他對面，復有一家人再相聚的感覺。「我KEEP得咁好，都係希望將來可以，無一百都要九十，睇住佢成長。堅持做運動，KEEP好自己身體，我好着重呢方面。因為爸爸差唔多係我呢個年歲就離開，如果佢唔係走咗，見到我成長，感覺會係點呢？我對爸爸印象只係留喺小時候，我覺得其實呢個係遺憾，唔想呢個遺憾再一次喺我身上發生，所以要KEEP好自己。煙酒盡量少，而家無吸煙，酒就更加少掂，已經無呢啲習慣。」黃澤鋒說。
- 小黃妃9個月大，兩公婆已經開始為她慶祝。
- 百日宴上，小黃妃雖睡着，但肥嘟嘟的小圓臉十分可愛。
- 黃澤鋒父親也是游泳健將，自小培用心栽培他，他感謝父親的訓練，令他成為一個不怕艱苦，事事要做到最好的人。
- 他希望自己有百歲命，看着女兒成長。
----------------------------
全新「和你撐計劃」 專享獨家禮遇 實際行動支持
按此了解更多
----------------------------
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
