袁彌明（Erica）的父母早年仳離，她與兄姊從小跟着媽咪生活，商人爸爸袁弓夷生活上很照顧子女，彼此關係良好，他雖然緊張子女的學業成績，但思想和發展則有很大自由度。
Erica的三觀自幼受着袁爸爸薰陶，父女間不但沒有代溝，上至談政論經，下至閒話家常，他們都非常啱key，天天都是他們的父親節。Erica近年有見爸爸年紀漸長，筋骨變硬，就堅持要帶他一齊去做瑜伽，操弗爹哋。訪問當天，他們齊齊穿上運動服，在瑜伽導師Peggy指導下，做出不少拉筋動作，袁爸爸依着指示由易到難，即使深蹲動作都應付自如，Erica還示範了倒立。71歲的袁爸爸笑言：「平日我會游吓水，但做運動最好有伴，個女叫到，我谷一谷就可以做到，做咗幾個月瑜伽，筋骨拉鬆咗，血行得都順啲。」
孻女拉心肝，袁爸爸亦特別疼錫Erica：「佢係我細女梗係錫，細個冇照顧過佢。見佢咁有大志，佢喺做生意同政見都好好，如果唔支持佢，點算係老竇。」Erica聽後說：「我細個時媽咪湊，周末會去爸爸度玩同食飯，爸爸唔識湊BB，但當我哋大個咗識溝通就會教我哋。佢會灌輸仔女思想同理念，對我哋學業要求好高，佢注重教育，要我哋講好啲英文、入間好學校，要我哋有獨立思考同要有智慧；佢唔係要我哋去學點樣慳水慳力，佢要我哋有大志向，佢教我哋點理財，佢對每個仔女都有一段時間財政封鎖，連交學費都要打電話返嚟香港求佢。我喺美國讀書時，零用錢好緊絀。爸爸有畀信用卡，亦有收緊過，收緊嘅時間咪知使錢都要識計數，要自己做預算，信用卡簽咗係咪找到數先。」
想當年面對袁爸爸的經濟封鎖，Erica就趁課餘賺外快補貼，袁爸爸說：「佢好彩讀書時喺餐廳打過工，呢個比讀乜嘢都緊要，佢哋知道錢嘅價值，香港大把有錢人，畀張卡外國讀書嘅仔女，佢哋懂得錢咩？有時候仲要耐唔耐閂水喉。」Erica為滿足慾望，在港讀中學就做兼職模特兒賺零用，到美國升學就去餐廳做侍應賺貼士，她說：「我中學時做model賺咗少少錢，喺美國讀高中時都使晒，爸爸同我交學費，媽咪好慳，佢畀嘅生活費啱啱好，一蚊都冇剩，我鍾意買衫、買袋、買耳環、買鞋，惟有自己去餐廳打工，每晚賺貼士都搵好多㗎，自己賺錢自己使。」Erica從不羡慕家境富裕的同學，「佢哋住嘅地方好，又會晚晚碌卡飲酒、食海鮮、食龍蝦，我唔會晚晚同佢哋出去，我都唔係過嗰啲生活。」相對之下，Erica總結出「做官嘅仔女榮華富貴，商人仔女對錢概念就好好多」。
袁爸爸管教子女再嚴厲，也有心軟時，他指Erica甚少問他攞錢，「佢話千祈唔好搞，我從來冇畀錢佢，令佢有獨立精神，佢唔想要我幫，好似佢靠我咁。」Erica在2005年參選港姐後加入無綫，因為性格率直得罪高層而入雪櫃，她自爆沒收入時曾問過袁爸爸經濟支援，袁爸爸表示印象中數目不多。父女之間不但財政獨立，就連大家生活都盡量不依賴，袁爸爸說：「我唔使子女照顧，我身體冇問題，佢身體又冇問題，點會掕住，到有咁需要又係另一件事，我而家身體好吖！」
袁爸爸作為上海人，強調從小就不許縱容子女變少爺公主，他有一套教育子女心得：「佢哋好細個，一年級就要去寄宿，我記得去睇過Erica，聽講佢有喊，但呢個係獨立成熟過程。上海好多好有錢嘅人係暴發戶，好嘅人點會縱壞啲細路，細路係最寶貴嘅嘢，你縱壞佢，佢又縱壞個孫，你咪同自己搞唔妥？我唔明嗰啲人冇文化，所以先會攞啲仔女去縱，我唔係睇唔起佢哋，以前我哋中國，尊重嗰啲清官，將個女嫁畀佢哋，屋企窮，但官要做得高，高官屋企又有錢，梗係貪返嚟。」袁爸爸續說：「我對佢哋冇要求，佢哋都搵得到自己目標，我畀佢哋三兄妹好自由，三個都好掂。」Erica現在是上巿公司主席，擁有十間百貨店，身家以億計，虎父無犬女，袁爸爸也驕傲囡囡的成績，袁爸爸很支持Erica當年踏上選美台改變人生：「選美有乜唔妥？又唔係去賣身，台上着泳衣啫，沙灘都好多人着泳衣喇！」
聽完爸爸講女，Erica也談談好爸爸，「佢好識做生意，講故事，佢會同我哋講好多歷史、經驗，引人入勝，我哋會喺裏邊學嘢。爸爸對我唔算惡，反而佢對我考入大學要求好高，大學學費咁貴，又入寄宿，對佢嚟講係投資。我雖然讀書幾好，但英文唔夠好，本來應該可以入間好啲嘅大學，而家諗返係我拎咗時間用嚟拍拖，咁爸爸冇話我嘅，考唔到最好嘅大學又唔代表我呢世玩完，之後追返囉。」
袁爸爸近日連番發表「深黃」政見撐年輕人，令網民深表敬佩，兩父女都抗拒共產黨，Erica因為由嫲嫲口中聽過她文革被批鬥的經歷：「嫲嫲喺大陸坐過20年，我媽咪爹哋都喺美國讀大學，喺美國讀書一定要讀佢哋嘅歷史，馬丁路德金嘅事，讀世界歷史又一定知甘地，冇人會覺佢哋唔啱，呢啲觀念，唔會細個有，大個會冇。冇人會唔鍾意自由同唔鍾意講真話，即使冇受過好多教育，亦唔會抗拒呢啲普世價值。」
撰文：比華利
攝錄：廖達燊、林賓尼
場地：Yoga Refine
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
