化身一日保母湊B嗌攰 Gin Lee將來誓做全職媽媽
李幸倪（Gin Lee）為配合年度首隻派台歌曲《敢》的主題，近期先後接受多項挑戰，繼踩Roller、學紋身後，日前又再挑戰「敢」湊仔！今次Gin要化身保母湊B「過三關」，包括餵BB食蛋糕、換尿片及剪頭髮，事前她都大叫心情緊張：「其實我好鍾意小朋友，不過好耐未湊過，未知表現如何？」當BB甫出場，Gin即表現興奮，不過BB面對陌生的Gin似乎不太受落，頻頻擰歪面，又放聲狂喊，Gin不斷出招，又唱兒歌又扮鬼臉，直至使出自創的「雀仔攻略」即時見成效，將BB「融化」拉近距離，她說：「BB一扭計，我就抱佢去睇雀仔，因為好多小朋友都鍾意睇啲郁嘅嘢，例如巴士、車、雀仔，所以呢招『雀仔攻略』係成功嘅！」
縱使成功同BB拉近距離，但Gin在餵食物時竟「食檸檬」，BB頻頻擰歪面不理會Gin，最終一啖食物都沒有放進口，認真失敗，Gin說：「我以為餵小朋友食嘢會最容易，因為好多小朋友都好為食，結果原來係最難，BB一啖都冇食，反而佢餵咗我食一啖。」去到換尿片環節，Gin一幫BB除褲即傳來BB嚎哭聲，頓令Gin顯得手忙腳亂，她說：「呢個（指條尿片）究竟係點除㗎？」最後使出渾身解數，勉強成功為BB換片，但Gin笑言「換片換到出晒汗」。最後在剪髮環節，手執剪刀的Gin竟順利地為BB修髮，就連她自己都難以置信表示：「比預期中順利，可能佢好專心玩佢嘅嘢，我可以好快就剪到。」
完成湊BB挑戰後，Gin直言在眾多的挑戰中，今次是最難的一項：「精神好攰，要諗好多計先可以○氹到BB；如果我將來要湊小朋友，我一定需要Full Time（全職），因為又要工作，又要湊小朋友，體力上好難應付到。」體驗過一日湊仔，Gin也不禁大讚天下母親的偉大。
來源 source: http://hd.stheadline.com
|
鍾意就快D Share啦！
|
|
|