鄭秀文（Sammi）與許志安31年來的感情經歷多翻波折，曾經歷分手後復合、結婚，去年4月安仔背妻偷食黃心穎，經過1年多的時間，這個「壞咗嘅人」已修理好，他誠心悔改，周一（15日）出席ViuTV音樂節目，誠懇表示已準備好，正式宣佈重新出發，他提到最愛的家人與Sammi時，一度眼濕濕。
安仔宣佈復出後，Sammi今天首度現身，於北角為新戲《聖荷西謀殺案》宣傳，接受記者訪問，今天下午2時45分左右，Sammi乘坐七人車抵達受訪的酒店，穿上藍色連身褲的她，精神飽滿。被問到老公復出時提到她時眼濕濕，問Sammi是否給予很大支持？她說：「冇刻意嘅，大家都住喺同一間屋，一步步嚟啦，始終出嚟面對群眾、面對呢個世界，自己承擔自己嘅事。幾時出嚟佢都有問我意見，我同佢講自己決定，因為你要自己去面對，當你ready嘅時候就去做，畢竟都年幾嘞，要練好首歌先，呢啲係重要過復出，經歷呢件事後，要面對咁多人唔係容易，要面對好多評語，要唔好介懷，呢一個係好大嘅心理關口，佢跨過呢一步，都戥佢好高興。」Sammi表示有看過安仔訪問的片段，覺得他表現OK，她說：「我叫佢自然同真心，呢年幾有乜嘢感悟要表現出嚟，要畀人明白佢嘅心路歷程，一切發自內心。」
Sammi表示跨過這一步實在不容易，感覺他輕鬆了不少，問到二人感情是否也跨進一步？Sammi說：「唔敢話跨唔跨過，一齊面對，唔係有事就得佢一個面對，夫妻是但一個出事，要一齊嚟承擔，呢個係面對婚姻同關係入面好重要嘅階段。」
言談間Sammi對安仔充滿愛，問到Sammi是如何做到？Sammi坦言感謝信仰的支持，她說：「因為當時有演唱會，幫我好多，之後我就休息整理自己，大家唔需要擔心我，我唔會揼心口，我自己已經有10年信仰，改變咗我嘅人生觀，呢件事令我更加成熟。對於安仔亦都改變咗好多，我係佢嘅身邊人，感受到好強，啲觀眾就要慢慢感受吓佢嘅改變同進步，有時我覺得摜低一鋪都唔係唔好事，我以前都由『臭four』到而家，係一個階段，當然過程係痛苦同慘烈，當回望過去就會覺得好好，因為會變得更好，會覺得值得。」Sammi直言安仔變得更踏實，也認清生命的重要。
採訪：羅慧敏
攝影：仇志德
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|