每個人都敵不過歲月洗禮，踏入40歲引發的中年危機，會憑心態決定命運。向來美艷高貴的Amanda S.，面對女人40突然頓悟，隨心而行讓自己快樂，是她的首要戒條：「生活唔容易，大家都有辛苦，但英文有句說話『Time heals everything』。」
Amanda S.（龍玥心）擁有來自父母的法台血統，身材高䠷纖瘦，從外在條件來說，絕對是得天獨厚，理應擁有幸福美滿的愛情生活。偏偏，Amanda與拍拖9年的Christian Cappelli離異，令不少人大跌眼鏡，她亦因情傷而暴瘦。回復單身不久，她遇上外籍男友Sam，但早前她在活動上透露兩人分手，而Amanda亦剛剛開始新戀情。
日前Amanda在灣仔接受《蘋果》專訪，雖然不欲多談剛剛萌芽的戀情，但大方分享對愛情的看法：「以前我會成日遷就對方，覺得配合大家，可以令大家開心；而家我接受咗，唔會可以令大家開心，個人反而放開咗、輕鬆咗好多。」她謂現時面對所有事，首要原則是令自己開心：「好簡單，好似你見到個朋友，佢成日都好開心，你見到佢都會開心，正如拍拖，所以我一定要愛自己先。」
曾經經歷婚姻失敗，Amanda還會考慮再婚嗎？她笑謂：「我真係唔介意，亦唔鍾意以結婚做目標，結唔結婚，喺而家呢個世界好閒。以前我會好想黐住對方，做乜嘢都諗起嗰個人，而家獨立好多；以前好快就好認真（對待戀情），而家唔會，所以你話一齊住，我可以接受，但如果一定要揀，I like my space。」
除了愛情，她覺得40歲的人生亦更自在：「Of course，20、30歲會經歷失敗，亦會有成功，所以40歲就好有信心畀自己做唔同嘅嘢，唔會理啲人點諗，個心想點就去做，follow your heart。就算有得失都要試吓，試一次，搵自己嘅目標喺邊度，可能個過程唔係最開心，但係要接受whole package。好嘢都會有唔好嘅方面，但係要全部接受，或者自己再努力啲、叻啲去面對。」Amanda坦言從前是緊張大師，每件事都想逼自己做得最好，現在的她學懂有耐性：「人生嘅經歷，會令大家性格改少少，生活唔容易，大家都有辛苦，但係唔緊要，每日都會學到新嘅嘢。」
面對傷心難過，甚至是無力感，她說：「英文有句說話『Time heals everything』，時間可以醫好一切。好似我最近學wake surfing，我好鍾意，亦都好proud of myself，而家我又整新餅，又有新嘅節目出街，我真係好開心。」Amanda提到的新節目，正是開電視的《神奇旅俠》，她回到曾經斷斷續續居住3年的倫敦，介紹不同的美食及時裝：「我好鍾意London，好好玩，有傳統又有modern嘅嘢，我哋去嗰啲時裝設計師嘅展覽，所有人都可以去，好多藝術嘢睇。」
她希望有機會可以在倫敦開設pop-up餅店：「好好玩，我自己都好有新鮮感。嚟緊我會喺中環再開6個月嘅pop-up餅店，專賣一個類似donut又似拿破崙蛋糕嘅甜品，而家有兩個口味，然後每月會再加一個口味，全部都係我親手造。有得做返蛋糕真係好開心，不過就唔會再開舖，香港啲租金太高，好難好難做，暫時都係以pop-up形式先，冇咁大壓力。」
場地：香港灣仔帝盛酒店
採訪：盧妹
攝影：葉君海
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
