來自馬來西亞的廖子妤（Fish Liew）來港發展已經第八個年頭，拍過多套電影，由《末日派對》出道演員，到裸露演出的《同班同學》，再憑《骨妹》提名金像獎最佳女配角。最近她跳入公仔箱，參演ViuTV劇集《地產仔》，劇內穿起西裝變身美男子，引起了不少迴響。一步步走來的演員路，雖然有過不少辛酸，但對演藝工作充滿熱誠的她表示：「希望建立只要見到廖子妤三個字，就係表演嘅保證。」
【反串男生入型入格】
外表總是帶點冷酷，平日愛以中性風格示人的Fish，今次在《地產仔》飾演愛作男性打扮的地產代理「魚哥」，造型官仔骨骨，為了演得入型入格，Fish在表情、語氣各方面都下了不少功夫，「好多人覺得我比較中性，但我唔係特別男性化，就係一般女仔，唔算特別斯文，識講粗口，對我嚟講都算係推倒從來，重新建構一個角色，由行路姿勢開始，譬如『魚哥』把聲，我想專登拉低，但一唔記得就會飆高咗，呢啲位拿捏，又或者同每個人講嘅方式，要重新度過係有難度。」
【拍劇忍笑最辛苦】
劇集主要由一眾新生代演員擔綱演出，包括胡子彤、吳肇軒、余香凝等，Fish分享整過拍攝充滿歡樂，「因為我哋本身私底下已經係好friend，變咗唔需要特別培養感情，一嚟就開始磨，撞出一啲新嘢。」也由於感情太好，加上一眾男演員性格搞笑，所以拍攝最辛苦，不是討論怎樣拍 ，或者要跟隨指示，而是需要經常忍笑，「大家全部「焗蟹」焗到膊頭係咁震」，問到會否因此經常NG？Fish就突然認真起來，「我就還好，因為搞到我我會憫，所以大家都唔敢搞我。」
除了新生代演員，還有久未在港拍劇、現已長居馬來西亞的鄭浩南，Fish與他劇內有不少對手戲，訪問期間，Fish除了大讚他友善、有型，更即興模仿「浩南哥」的語氣表情，發揮搞笑本色，「佢好鍾意同我哋分享以前香港電影好輝煌嘅歲月，佢係點樣經歷，又或者演戲嘅心得，同埋佢知我係馬來西亞人，佢依家長期定居馬來西亞，就會同我分享有咩好食，問我有冇去一啲地方，香港依家對我黎講比較熟識，我哋好似對調咗身份，所以份外有親切感。」
【感恩所有好與壞】
來港打拼八年，當中的辛酸、寂寞，當事人現在輕笑嘆出一句「唔好提喇」，「其實就算以前到依家，每一個演員都有辛苦嘅過程，唔辛苦好難做到演員，因為我哋需要真實經歷，可以借用喺表演上面，無論係離鄉別井，好多時候好孤獨，或者一啲不愉快回憶，對我嚟講都係好事，豐富咗我嘅表演，所以我都幾感恩，所有好同壞嘅經歷。」Fish當年隻身來港，現在總算有了一種安心感覺，「我有諗過就算喺馬來西亞都可能有一種孤軍作戰的感覺，依家租咗一間屋，有自己嘅小天地、自己嘅貓，自己嘅朋友，人都係孤單需要面對自己，我有時都幾享受呢種孤單。」
作為演員，往往都是被動的，Fish説雖然喜歡演戲，但也希望為自己尋找出更多路向與可能性，「我都希望做演員做到老，但現實話比我知唔得。」本身修讀剪片的她，成為演員前，希望投身做導演，或者幕後工作，最近積極重拾了這方面興趣，希望與朋友合作拍攝一些短片，賞試做導演，或者剪輯，一些小型創作，「我都一直都搵緊可能性，演員可以一直做，如果好彩人搵我演戲，但都想睇吓自己可唔可以做到一個好嘅創作者。」
【放假鍾意周街行】
自言最怕接收太多訊息、太多聲音的Fish，工作之後，除了在家「攤住」，最喜歡就是「周街行」，「我個人認為香港，相比我嘅家鄉馬來西亞更適合行路，好輕易可以去到郊外、行山，又或者唔一定要搭地鐵，近嘅話，行路都係一個選擇。」即使已經來港八年，她説還未看膩，「仍然覺得一啲燈牌、舊建築好靚，就算係新建築都好有趣，我會想用眼睛發掘靚嘅環境，影相也好，又或者當係睇景。」她把行路喻為「散工」，當作最好的休息。
造型、採訪：陳蔚渝
攝影：郭賢興
化妝：Cheryl Lee
髮型：Zap Tang @ essentuals.hk
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
