林作投身保險行業數月，做到有聲有色，不過最近卻惹來投訴，讀者Vanessa日前向《蘋果》投訴疑被林作恐嚇，她表示當初看到《蘋果》的報道得知林作開始從事保險業，碰巧有需要，所以相約見面以了解醫療計劃：「我簡單直接問有咩醫療計劃會適合我，佢哋就話我只需要買一份儲蓄危疾，我話其實危疾我本身都已經買咗幾百萬保額，而家只需要一份實報實銷醫療保，佢哋態度就180度轉變，開始唔再理我，然後弄自己的iPad，我見佢咁態度就話決定再考慮吓。」
讀者Vanessa表示會向保監局和林作所任職的保險公司作出投訴，並提供了在社交平台發表的一則對林作表現的評論文章截圖，她對《蘋果》聲稱：「結束會面後我在自己的私人戶口發佈了一些對會面的感受，覺得自己不被尊重，最後收到恐嚇。」她在評論文章提到對林作的評價，「但總是離不開帶點二世祖的傲氣，見客態度有待改進，還是不夠貼地，見緊我仲喺度用iPad整其他嘢，不太尊重客人，暫時5/10分……就算你牛津咩咩咩都好，都不可以太過串（寸），係要需要更加謙虛。」
至於提及的涉嫌恐嚇，讀者提供和林作的WhatsApp對話截圖，當中有林作罵Vanessa：「你呢種垃圾，我會給你一個教訓」、「我不會放過你」、「等收律師信。你不賠償跪下來道歉我不會停手」、「我會持續搞你」、「我會斷你米路」等，最後林作要求她出道歉post，否則會採取法律行動。對話當中，Vanessa曾經向林作道歉：「我覺得做人無需要咁樣」、「你太過於激動」、「如果我得罪你，好。我道歉，對不起」、「但我不會找你簽保單了，抱歉」。
《蘋果》就讀者的投訴，聯絡林作了解，他跟讀者的說詞卻大有出入，同時提供了WhatsApp群組對話截圖，指稱是Vanessa對其下線同事作出的滋擾對話罪證，其中一個cap圖對話，Vanessa寫道：「要玩最大，就係要林作終身免費法律諮詢先係trump card la，放行算甚麼。」還有「連林作都要畀面我，就憑你講兩句我要聽你講？請問你邊位？」等字句。
林作接受《蘋果》訪問，駁斥對方撩事生非在前，原本要求對方出post道歉便不再追究，但出完道歉post卻繼續生事，並對其下線同事和女友裕美作出騷擾，為要殺一儆百，決定訴諸法律行動。林作說：「我喺度嚴正聲明，呢個人應該係有精神病，或者有社會病，我公開提出贊助佢醫藥費。佢周圍撩是鬥非，靠同人嗌交為生呢啲人好可悲。」
至於事件始末，林作透露約發生在兩周前，對方主動在網上聯絡他，於是他和下線一位同事赴約推介服務：「佢完全唔願傾，佢唔係想出嚟傾保險，佢唔係一個客，只係想搲水吹，呢種人以為自己特別巴閉，騷擾我、下線、冇見過嘅下線同事，又send短訊講關於我女友嘅嘢，我唔叫性侵犯，都叫對我私事造成滋擾，呢個好恐怖，我已提出要發律師信。我係警告過佢，佢繼續係咁樣，我會搞大佢。」
他續說：「有網民同我講，佢想做新聞想出名，佢想見報，我唔想益咗呢啲人。既然要講，佢間鋼琴學校學生千祈唔好搵佢補習，佢係有病，呢啲人一定要繩之於法。」問到他如何被誹謗？林作表示：「佢喺網上出post話我係一個唔專業有問題嘅人，但佢約我傾保險，出到嚟唔係傾保險，問我私事，問我屋企事，然後騷擾。佢一定係冇朋友，平時冇人睬佢，好想有人理佢，心理變態。」能否提供證明？林作即說：「大把。老實講，我唔願意花時間去做呢啲嘢！但佢出咗道歉信，又想繼續做，我係奉陪到底，我公開佢資料，將所有精力令呢個人一無所有，我要令所有人知道，夠膽同我玩嘢嘅人係冇好下場。除非佢拍片跪低面對我道歉，否則我一定進行落去，我非常之願意殺一儆百。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
