溫碧霞因為疫情肆虐停工幾個月，推了很多工作，下月復工上大陸拍廣告，日前她在相思灣接受訪問表示：「預計8月初，如果仲係要隔離都要工作，因為都冇辦法，暫定去內地拍廣告、出活動同傾新戲，好開心咁嘅市道仲有好多廣告，預計10月開新戲，香港同內地都有。」對於合拍片要減片酬兼要藝人交稅，溫碧霞表示：「係呀，嗰方面公司安排，但我唔介意，市道唔好，大家都唔會咁高，適量地調整冇所謂，最緊要遇到好劇本。」
入行多年的她，最希望跟王家衛合作：「我嘅夢想希望有生之日可以同王家衛合作，因為王家衛係我最鍾意最欣賞導演，如果引退前有機會同佢合作，今生無憾。」問到會否自薦？她坦言：「冇諗過，我覺得緣份，記得佢有搵我做《旺角卡門》，嗰時啱啱拍《地下情》，唔知點解冇咗下文，我好鍾意《阿飛正傳》、《旺角卡門》，每部作品都好經典，覺得佢係香港奇才。」
至於她的工作室亦籌備新戲，男主角未定，她說：「導演希望古天樂演男主角，初步我都覺角色好啱古仔，希望再同佢合作。」兩人曾合作1997年版的電視劇《圓月彎刀》，相隔23年，溫碧霞說：「之前拍《圓月彎刀》到而家，嗰時佢都未曬黑，但好靚仔，同佢合作係我最sad時候，因為爸爸啱啱離開，我同佢拍戲時自己流眼淚，佢都有問我，佢同我傾偈，咁靚嘅男仔喺我面前，我都冇感覺，因為好傷心，但咁多年見番覺得佢真係非常有義氣，默默地幫到好多人。」
此外，由於疫情關係書展延期，溫碧霞《Memories》+《海潮》慈善紀念版寫真集改在網上出售，她說：「寫真相以喺塞班島影嘅寫真為主，自己寫少少散文，由細到大成長經歷，諗番自己15歲離家出走，喺街遇星探搵我拍戲，我就係當時嘅靚妹仔，好反叛，《靚妹仔》真係改變我一生，如果冇呢個機會，唔知我嘅將來會點。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|