2020年7月28日星期二

【禁堂食】屋企開飯仔女嘈到拆天林盛斌無奈搖頭兼反白眼 #林盛斌

【禁堂食】屋企開飯仔女嘈到拆天林盛斌無奈搖頭兼反白眼

細仔道申、大女霏霏都講到企晒起身好激動，二女熹熹講埋一份，細女機機坐住媽咪大脾，Bob嫂反而聽到笑晒口。

新冠肺炎社區大爆發，政府宣布加辣抗疫措施，包括周三起全港食肆禁堂食擴及全日。林盛斌（Bob）昨晚上載一家6口坐喺飯桌前開飯情形，留言：「其實冇得出去食飯都好嘅，費事嘈親隔離枱啦...........」

片中Bob跟老婆同4個仔女食飯時，討論話題時你一言我一語，嘈到拆天，基本上聽唔到講緊乜，只係傳來女聲講：聽我講先..畀我啦...唔係咁呀...大女霏霏激動地講到企晒起身，手舞足蹈，細仔就企喺張櫈度猛講BB話，見慣「大場面」嘅Bob嫂一咪笑笑口，耐心聆聽仔女訴求，Bob卻無奈搖搖頭，冇晒老婆仔女辦法。

梁家玉留言：「真係好正」、陳詠謙話「好澎湃」、許家傑坦言「日日係咁真係會爆炸」，阿Bob回應係！唔少網友話「笑死」、「攞你命三千」「做完嘢返到屋企，見到咁情景真係人都癲」、「珍惜珍惜，當他們成長後就會愈來愈少」、「三個女人一個墟，何況有四個咁多，細佬明顯輸晒」、「幸福的家」、「bob表情好正」。