由去年反送中運動開始一直撐警的大台藝人曹永廉，因為同楊明等人送暖到警總搞到被廣告商爭相割席，去泰國旅行時又衝出嚟爭住認是「撐警奀星」。撐得警多，總會有一、兩樣國家任務，曹永廉去過大灣區舉行fans見面會外，最近曹永廉又接受了黨媒訪問。難得有機會當然要落足鞋油，雖然曹永廉2018年在訪問講過子女都是加拿大籍，但講到自己，就盡情表忠，指自己是土生土長的中國人外，更表明自己支持成立《港區國安法》。
曹永廉最近接受了「人民網香港」訪問，能夠得到黨媒賞識，當然要在微博中轉發致謝。訪問中，曹永廉雖然指自己在香港出世，但他就以「土生土長嘅中國人」來形容自己：「我係中國人，我阿爺、我阿爸、我任何啲祖宗都係中國人，我唔可以唔認自己係中國人，我一定要支持番自己中國。」而他又提到因很多家人在廣州，故小時候經常去大陸，自己亦一直看到大陸進步。
提到去年因舉家去警總撐警送暖被網民鬧爆，更同時獲多間公司爭相發出聲明與他割席，曹永廉就解釋當初不想被人知道自己撐警：「我見到上年有好多暴亂嘅事件，好影響到我哋身邊好多人，我認識好多警察，我知道佢哋好大壓力，我覺得係需要畀少少鼓勵佢哋。其實喺上年我哋成日都會送嘢去警察部門，但我哋好低調，當然大家都知道上年啲暴徒好緊要，佢真係會做好多嘢去攻擊你，我哋都選擇咗用一個低調、唔想俾人知道嘅情況去支持警察，買嘢、同佢哋食嘢、影吓相鼓勵吓。」雖然打算低調撐警，但立場最後卻被豬隊友貼相公開，不過他卻謂：「行出咗嚟，我覺得自己對我屋企人有個交代，對我小朋友，我畀咗個正確諗法佢，呢樣嘢係有錢都攞唔到，好多身教，所以我小朋友好乖，佢同我一齊去探警察。」
撐警曹永廉亦有贊成成立《港區國安法》，他說：「《國安法》係好正常嘅一個法，每一個國家都有，你點可能會俾一班搞事、搞亂香港嘅人，一路喺度生存緊，亦都知道佢搞緊事，我都唔加個鎖去鎖住佢？我自己屋企加個鎖，關你其他地方咩事呢？其實我知道好多人支持，好多人支持《國安法》，希望做咗之後一步一步好。」
而他亦無視去年港人多次進行和平遊行表達訴求的事實，只斥責年輕人使用暴力：「無論你要爭取咩嘢，你都唔可以用暴力，每一個人都要經過一個艱難或者你真係付出過，為香港又好為中國又好，我付出過希望得返啲嘢，你可以有個希望，但如果你冇付出過嘅，你希望啲咩？其實你為國家做過啲咩呢？就算而家班後生仔，你為香港做過啲咩嘢？你冇為香港做過啲咩，但你想要求好多好多好多嘢，呢樣係唔啱嘅。」
不過話時話，自稱「土生土長嘅中國人」曹永廉，雖然在整個訪問中落足鞋油，但他全程卻以廣東話進行對答，似乎欠缺誠意。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
