「你有冇覺得我連累你？」歐陽巧瑩問老公。
「你都問我好多次呢個問題，我每次畀你答案都係冇，點解我老婆覺得有連累我咁得意？我唔鍾意連累呢個字，每個人生命都有自己選擇，呢個結果只係非常好嘅契機。」林師傑答老婆。
今年3月，港姐歐陽巧瑩宣佈離開無綫，回復自由身的她在網上自由發聲，支持黃色小店、鬧教育局長、撐港人加油，有說林師傑被連累遭大台掟入「雪櫃」；上月，林師傑宣佈跟大台解約，因為大台提出1年6騷侮辱價，年收入1.2萬元根本不夠養家，婦唱夫隨跟着走。
不再是大台人，兩夫婦首次接受《蘋果》訪問，在鏡頭前互問心底話，聽到老公說沒有連累，歐陽巧瑩除去心中那條刺，但隨即又湧起現實問題：「我係極力支持你離開舊公司，好開心但又好擔心，每個月支出都係錢，你有冇諗過，嚟緊我哋真係積蓄使晒？」林師傑淡定地說：「我覺得唔會，首先我哋都有啲積蓄……」歐陽巧瑩插嘴：「我計過係用到1年。」林師傑安慰：「我哋唔係冇工作，有兩個YouTube Channel（陋室和狼人殺），而家香港人想揀好嘢，諗支持邊個，只要繼續做好嘢，相信好人會站我哋（嗰）邊，如果唔係唔知點解要繼續留低。」
輪到林師傑問老婆心底話，他認真思考後：「其實你想我做點樣嘅男人？」她說：「我想你做一個好爹哋，我想你管理好自己脾氣同錫自己多啲，由我同你拍拖到而家6年，唔知點解你唔識錫自己，你唔錫自己等同你唔錫我，你把口講幾錫我冇用。講一個令我好心痛例子，你每一日喺舊公司做完節目返嚟，你同我講好唔開心，訪問咗啲好差嘅人，點解咁差嘅人都可以坐喺台上，而自己唔得？所以去到你擗炮唔撈，我係好興奮。」
第二個問題，林師傑問老婆：「係咪唔離開香港？」歐陽巧瑩坦言：「呢個問題我心思熟慮咗好耐，因為你喺西班牙出世，喺新加坡當過兵，你隨時返西班牙同新加坡成為當地居民，但我未想走住，我鍾意呢個地方，我英文唔好，普通話唔好，去到要重新適應；第二，因為我喺香港大，喺香港住公屋，讀東華三院學校，由細到大睇舊公司劇集，鍾意食中餐，我覺得繁體字同廣東話唔可以取替。」她笑對老公說：「你而家屋企喺呢度，屋企大佬係我，呢個大佬鍾意留喺度。」林師傑也笑：「跟大佬搵食。」
2013年歐陽巧瑩選港姐後簽約大台，今年回復自由身，在網上爆seed「我真係唔想再同佢有關係」，原來，7年時間經歷「生不如死」：「我唔憎呢間公司，但絕對唔講得上鍾意，參加港姐係工接工嘅時間，誤打誤撞入到尾（輪）攞友誼小姐，落台蔡思貝、朱智賢喊到死，點解我唔喊，因為我冇諗過係我，我份人好唔友善。問番女仔點解投票畀我，原來因為我一個人孭晒負面新聞，我入行前真係好貪玩，因為我冇當男女有乜分別，同男孩子玩覺得我好放蕩。我攞友誼小姐，朋友笑到我面紅，好辛苦經歷咗幾年，真係生不如死。」
擁34C火辣身材的她被封為「咪神」，其後獲安排主持《3日2夜》才開心些：「台前幕後都係朋友，每日返去寫份稿，唔覺得難受，到我真正覺得一定要離開呢間公司係拍劇，因為我真心接受唔到要演第二個角色；第二我接受唔到階級觀念，有啲人認為我做得呢行就要接受，你又唔係阿姐又唔係一線紅星，自然優待冇咁高，我明，所以我唔做，我接受唔到人哋唔尊重我。」
屈了7年的她，不吐不快：「記得我拍某一部劇，要着得性感啲，我想講，我胸前有幾多肉就幾多肉，你叫我點樣去裝去唧都係得咁多，而且我覺得出嚟效果已經唔差，點解仲要當住咁多男人面叫我擳勁啲，咁樣對我係好唔尊重，可能佢覺得你係二打六，叫你做就搏盡啲啦，但我根本唔奢望呢啲機會，你哋咪封殺我囉；第二係拍某一場戲時，要跌落一個地方，一嚟我唔係動作演員，二嚟我着吊帶背心冇可能墊pad，我真係硬跌，你話我做唔到，我都冇辦法，但態度同語氣我接受唔到，冷言冷語令我好唔舒服，中間夾雜粗口。我唔係話佢哋唔好，可能係呢個圈子生態，但自己接受唔到。」歐陽巧瑩在大台劇《金宵大廈》中，有場戲着低胸衫做瑜伽，網民指是全集亮點。
林師傑比老婆在大台的日子更久，長達11年，她說：「我拍嘢不受尊重，所以我唔做，佢有天份，佢係應該生不如死！」他自嘲：「我生不如死就抵，因為我真係想要呢樣嘢，臨走仲話我耍大牌，唔接乜大角色。我本身仲有兩三年約，之前真係諗住好唔負責任地，逗份底薪過埋兩三年，我都明知唔會特別多嘢做，睇住自己cut騷，之前底薪ok。」歐陽巧瑩坦言：「上到2萬。」他笑說：「我貴㗎，公司唔想用我㗎，點解我越嚟越少騷，因為貴囉。」
歐陽巧瑩代夫抱不平：「自從公佈離開，好多人話林師傑本身有錢冇所謂啦，我想話我俾呢啲新聞誤導咗先揀佢，其實同佢一齊之前，我都以為佢好有錢，點知第一次去佢屋企，所謂獨立屋，危樓咁樣，明明新聞話佢駕過百萬波子，架車又殘又冇燈。而家我幫佢管理銀行戶口，我都好精準同大家講咗，如果我哋嚟緊零收入，我哋可以活多1年，大家計番香港租金，大概知我哋剩番幾多錢，千祈唔好再講林師傑有錢，我5年冇買過新衫，佢都係，唔好再標榜林師傑有錢，扼殺咗工作機會。明明我日日計住錢，計到好唔開心，而家佢架車仲要冇冷氣，壞咗未整。」
離開大台後，做回自己的歐陽巧瑩比選港姐時暴脹20磅，現立志從政，4年後選區議員，爭取大麻合法化，這個志向夠離經叛道：「近呢年明白香港重要，真心係一隻港豬，自從九七之後，我對香港藝術事業好失望，純粹我眼界唔夠闊，有日認識導演李卓斌，睇完佢部電影《G殺》覺得有曙光，所以我嗰下有反省。我想參選區議員，我嘅政綱同好多人唔同，我想推動藝術，香港文化絕對值得全世界認可，近幾年冇人談及香港文化，自己有搵答案，我覺得話事班人唔識尊重呢個文化，永遠想你做啲配合某一個國家水平藝術，呢啲我哋唔會鍾意，唔會得到世界讚賞。」
曾在瑞士試過大麻的她，雖然不喜歡那陣味，卻想推動合法化：「你話點解推動大麻合法化，我講咗呢樣嘢好多人抨擊我，如果講醫用大麻就得，但如果講娛樂用大麻，好多人攻擊我，話我嘩眾取寵博乜，sorry，我冇諗再做幕前，香港去到呢個moment，我諗唔到有乜方法令香港復蘇，太多朋友話香港返唔到以前，咁有冇諗另覓出路？醫用大麻合法化好多國家行緊，但我想香港唔只醫用大麻合法化，長遠嚟講，我想深入探討係咪娛樂用大麻合法化，對於香港經濟、民生各樣都好好多，首先旅遊業可以提升番，我諗唔到如果我作為外國人，點解要嚟香港，有咁多因素、法例導致未必想去香港旅行，咁香港旅遊業點算？零售業同酒店業點算？」
老婆想從政，林師傑撐硬：「佢無論如何我都支持，除非佢唔想再做我老婆，我就未必支持佢呢個決定，或者檢討一陣先，我哋講好咗兩個分擔一條命。」兩人先後離開大台，現沒穩定收入，林師傑做獨立歌手路更難行，「我真係半紅不黑，冇上過一二三四線位，但唔緊要，呢段時間『陋室』會做好多作品，希望有local culture，搵到自己聲音。」林師傑唱出自己有份作曲填詞的歌曲《Stars》，找拍檔Terry To 拍攝片段，歐陽巧瑩坐在台下如fans般，聽得好陶醉，還不停為老公拍照，情是這樣濃。
最後，問兩人離開大台後仲有冇睇TVB？歐陽巧瑩笑：「我屋企收唔到TVB！」
撰文：余燕儀
攝影：沈健程
攝錄：馮嘉銘、葉君海
場地：谷Stage
化妝、髮型：BuBu
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
