昨日美國有報道，指葉玉卿老公胡兆明個人及旗下三間公司申請破產，惟原定於美國時間，昨日舉行的三間公司物業拍賣會最終延期。葉玉卿今日接受《蘋果》訪問承認老公破產一事，更指目的是避免俾人再呃，保護老公價值兩億美元（約15.5億港元）的發跡物業。
葉玉卿以短訊回覆表示多謝關心，生活暫時亦未有大影響。她表示，今次是引用美國破產法例第11章保障權益︰「Chapter 11 係破產重組保護令，其實係對負債人保護。胡兆明都有做私人乜嘢（破產），你都睇到，我哋就係唔想去拍賣，所以先至咁做。」她指債權人利用商場上常用的「Loan-to-Own」，想去蠶食胡兆明公司的物業。她補充說︰「嗰間出名係高利貸公司，中咗佢哋圈套，貸款到期想重貸又唔畀。Anyway都唔係好大問題，點解去到咁已經過咗，走呢步用到Chapter 11 ，係想要保護呢兩億（美金）物業，先生好想保留，點解一路都圈住，同律師開過會，最後只有行呢一步至可以保護到我哋呢啲產業，呢批產業係值兩億美金，係先生發源地，佢發跡地方，所以要行呢一步。當然面子、信用或者聲譽就有影響，所以佢就唔想行呢一步，不過冇辨法。反而而家行咗心情輕鬆咗啲。」葉玉卿笑言：「心情就好似埋單計數，在聯邦法庭前面不用俾佢哋呃，對方不單止數目唔清楚，利息係點計呀，到時上庭就可以一清二楚。」
講到家庭生活未有受大影響，三個仔女都好乖，而且經一事長一智，過一關，三姊弟更加成熟，她說︰「佢哋學到嘢，唔會縱壞，仲會幫手分擔仲好支持爹地，個仔係Cornell（大學）都咁忙，但都好幫手好關心，都學到嘢，律師開會、會計師文件所有嘢，都喺度幫手開會去睇，自己都學到嘢。」她解釋的美國破產期跟香港不同，沒有一定期限，要視乎雙方解決方案︰「冇話幾耐，睇下可以拖幾耐就幾耐，睇下自己有冇解決方案，如果有解決方案就早搞掂，如果遲可以拖一年、兩年時間。我哋梗係唔想拖耐啦，對方更加慘唔想拖。生活暫時冇乜嘢唔同，唔係破產清盤，係重組一個保護令嚟，所以都ok，多謝關心。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
