- 【無綫人心惶惶】余詠珊輕視疫情曾要求如常錄影 薛家燕：唔錄啦，有起事嚟都幾大件事
- 8小時前
懶理14日隔離
本港至昨日已有逾2100宗武肺確診個案，第三波疫情令娛圈火燒連環船，歌手施匡翹的感染群體搞到新城變「疫台」。但之前被她及宣傳人員阿佳波及的無綫好「淡定」，助理總經理余詠珊更懶理十四日自我隔離期，要求檢測呈陰性的台前幕後，火速埋位如常錄影。
由於新城知訊台執行總監程凱欣，最初檢測結果是陰性，翌晚才發現確診；冇得自我隔離，令大台員工非常不滿，人心惶惶！
- 《流行經典50年》的節目組很幸運，全靠薛家燕幫口，可以延期拍攝。
曾經一意孤行
施匡翹及宣傳人員阿佳等日前確診，無綫追蹤到96位職藝員曾跟他們接觸，並安排他們接受武肺檢測，初步結果全部呈陰性，是不幸中的大幸。據悉出檢測結果前，余詠珊已懶理同事反對，一意孤行要求同施匡翹接觸過的相關高危藝人縮短自我隔離，如常錄影，受影響的節目包括《#後生仔傾吓偈》及《流行經典50年》。
「《後生仔》本來21號有廠，上星期六爆咗施匡翹中招單嘢，節目入面嘅戴祖兒同KOL陳欣茵，同施匡翹一齊上戲劇班，之後陳欣茵又同一班《後生仔》主持開工，牽連好廣！搞到之後綜藝科好多台前幕後都要去做檢測。珊姐（余詠珊）本來話出咗報告，冇事就繼續錄影，唔知係太遲出晒報告，定係驚俾人話，佢突然取消咗，暫定29號再錄影，不過到時都未隔離夠十四日。而陸浩明、戴祖兒同陳欣茵仲繼續做big big shop個感謝祭，差不多完全冇隔離，佢哋拍嘢冇得戴口罩，其實好危險，都唔明啲高層諗乜！」工作人員感到無奈。
全靠薛家燕幫口
至於《流行經典50年》，節目主持之一的鄭俊弘，其未婚妻何雁詩日前跟確診的宣傳人員阿佳一起工作，加上《流行》台前幕後人數眾多，余詠珊本來拍板在20號如常錄影，實在有很大風險。但該節目組很幸運，全靠薛家燕幫口，可以「避過一劫」。「本來珊姐堅持如期錄影，但係有人提出家燕姐都70歲，唔好要佢冒險，不如改期！而家燕姐都出聲，見佢擔心，珊姐先至冇企硬。」幕後人員透露。
本刊向薛家燕求證時，她承認此事，但表示無綫有聽意見。
「唔錄啦，因為有啲歌手去過《勁歌金曲》，之後再嚟《流行經典50年》，包括幫何雁詩嘅宣傳人員阿佳，佢有感染，所以Cancel。嘉賓都會擔心，嘉儀同Fred（鄭駿弘）都擔心，Band又十幾人，Dancer又十幾人，嘉賓又十幾人，全部冇得戴口罩。嘩，有起事嚟都幾大件事，所以嗰日漏夜同監製商量，第二朝一早通知取消錄影，本來星期一（20日）錄影。」薛家燕坦言。
被問到余詠珊是否本想如期錄影，薛家燕說：「係，但佢冇堅持，佢都聽意見。我哋冇得戴口罩，同埋大家要互相Chit-chat講嘢，所有歌手、保母group咗喺二廠，好易感染，依家改下禮拜一錄影，等監製通知。」
- 近日薛家燕曾跟新城知訊台執行總監程凱欣，冇罩共處錄音室，知道程凱欣確診後，薛家燕即自我隔離。
擔心中招自我隔離
幸好延期錄影，事關週三（22日）新城知訊台執行總監程凱欣確診，近日薛家燕曾跟她冇罩共處錄音室，薛家燕直認擔心，現正家居自我隔離。無綫上週六傍晚出通告，宣布暫不讓傳媒進入採訪外，還取消兩日記者會，封城四天進行消毒後，由今天開始作有限度「解封」，據悉綜藝組幕後仍人心惶惶，然而余詠珊卻一聲號令，堅決要今午如期舉行《2020香港小姐競選》記者會。
疫情殺到埋身，無綫仍然business as usual（一切如常），的確「勁」！
----------------------------
ChannelNEXT人民學堂：識法大講堂
曾志豪X劉偉聰 同你拆解「港版国安法」
立即收看
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
