湯怡幕前幕後一直都畀人乖乖女形象，在她的演出中難以找到激情賣點，但隨着年紀漸長，湯怡開始大膽嘗試，不抗拒拍性感親熱戲，還預告年底會有一套激情作品推出，會令大眾驚喜譁然。
32歲湯怡前年與洪卓立結束11年情分手，女方其後雖有爆緋聞，但她強調現在單身。問到湯怡可恨拍拖？她自爆身邊人較心急，她日前在灣仔接受《蘋果》訪問時說：「我啲朋友同阿媽都好擔心我，個個踴躍介紹身邊男仔畀我識，以前我都會落閘，唔好搞呢啲，單身初期好抗拒，只想順其自然，而家當識多個朋友傾吓偈，睇吓夾唔夾，畀個機會大家，我再係咁落閘都唔係辦法。」不過，湯怡抱開放態度卻未遇上意中人，她深信仍需要鼓起好大勇氣才能再開始一段新戀情：「可以的話，我想下一個係結婚對象。」家人擔心湯怡變「賣剩蔗」，她則說：「好彩家姐結婚已有小朋友，細佬又拍拖，預咗佢會爬我頭。媽咪成日擔心我結唔到婚，我同佢講放心，唔會結唔到嘅。」湯怡自知擇偶講緣份，她沒有特定條件，喜歡心智成熟型兼孝順的男仔。
湯怡近日有份演出的電影《死因無可疑》在疫情影響下上映，不過上映一周，該片票房成績不錯，曾登上單日票房冠軍，累計票房已超過600萬，湯怡說：「今次感覺好唔一樣，始終疫情影響入座率，但觀眾都好熱情，感受到大家支持港產片，呢段時間上係好時機，好需要香港人支持番香港人電影。」她在戲中跟重量級前輩廖啟智首次合作，自言十分緊張，拍攝時背好劇本才到現場。湯怡跟影后林嘉欣也有兩場對手戲：「去到現場同嘉欣對戲，嘩，點解林嘉欣咁嘅？完全唔相信，佢喺我心目中一向係女神好sweet，知道佢為造型落咗好多工夫，無論增磅、肢體語言、聲線，一開口我係呆咗，完全唔係我哋識嘅林嘉欣，而且佢喺片場唔多講嘢，氣場好犀利。」
湯怡大爆與相識十年同門陳家樂拍親熱床戲竟嫌不夠喉：「劇本需要可以再激啲都得，識咗家樂十幾年，有一定信任，冇咁尷尬，佢反而覺得越識得耐越尷尬，記得導演冇要求我埋位時要拉低條褲，但拍攝時竟然....我都照去冇停，之後我同家樂講番佢啲鬚好拮，因為佢捱夜拍通宵，佢覺得我唔好講呢啲啦，反而令佢更緊張，但若果唔熟係唔會講，拍完就算。」湯怡過往拍的親熱場面總是點到即止，她否認回復單身才大解放拍性感戲：「可能一直比人感覺斯文細個，而家開始成熟有女人味，唔介意呢類演出。」
採訪：卓寶花
攝錄：馮嘉銘
場地：Mustard Seed Co-working Space
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|