出名霸道的大台近年人才流失，時代變化令藝人找到不同出路，告別公仔箱不再可惜。20歲的邱晴（Mandy）年紀輕輕，效力大台3年後決定抽身離開，不想受合約束縛，希望趁年輕闖出另一片天。「有好多框框限住自己，只可以跟住佢哋想我點做。」這是邱晴對舊公司的看法，離巢後她享受自由身，不愁冇工開，日前她化身印度西施拍攝飲食節目，開發網上頻道進軍東南亞巿場，即場學講印度語「我愛你」冧觀眾。
拍攝當日，邱晴花了近一小時整裝穿上印度傳統女性服飾上陣，一身火紅色造型艷麗火辣，有薄紗穿配，下身要穿上一條又緊又窄的貼身褲，話明印度look，額頭點少得一點「bindi」？邱晴開始了解印度人文化：「呢粒（bindi）原本係結咗婚女性先會點，同時有第三隻眼，代表保護自己意思。」試完民族服飾後雖然覺得辛苦，但邱晴仍期待日後可以學習跳印度舞。
今次花心機變身印度傳統女性，其實是與印度餐廳老闆森合作，拍攝一個名為《飲食森晴》的飲食節目，食盡香港咖喱和東南美食，從而進軍不同巿場，邱晴說：「節目構思係一個正宗印度人，但內心好香港人，同我身為一位純正香港人，一齊撞埋有咩火花，香港有不同種族，想藉住頻道將大家融合，不分彼此都係好朋友。」
離巢後，有指邱晴會簽約成為樂宜師妹，她堅稱暫沒意慾簽經理人：「可能會有單一合作，現時嚮往自由身，可以自己傾好多嘢。」雖然在逆巿跳出comfort zone，但邱晴對前景有信心：「全部嘢掌握自己手中，自己努力有目標前進。想做一個叻女，唔會令人覺得我只係識笑嘅女仔，希望多啲變化。」不過她對性感路線就耍手擰頭：「NO，NO，NO，NO，我較保守，條裙短啲都唔會，最重要係保留自己青春，同埋我現時仲係比較肉感，性感又有啲肉會好肥美，我唔想咁樣呀，想自己係一個棉花糖女孩。」
邱晴2017年以17歲之齡參選港姐，因年輕有潛力，迅即被大台簽成旗下親生女，曾在不少劇集中做閒角但未見突出，兩年前主力助陣兒童節目《 Think Big 天地》，但突然決絕離開，她解釋：「公司合約有好多框框限住自己，只可以跟住佢哋想我點做，就大概要點做，我覺得而家呢個年紀可以去試多啲嘢，包括讀吓書增值自己，仲有合約喺身我就做唔到，亦有傾緊服裝頻道。」接住會主力開發網上巿場：「現時資訊都喺網上得來，咁樣可以同大家零距離接觸。」雖然跳出大台有風險，邱晴承認現時零收入，要靠去年台慶夜抽中的52萬獎金慢慢「搣」，不過她從不後悔：「而家可以創造更多收入，以前收入對一個新人嚟講叫合理，平常得一萬左右，但學到嘢。」
邱晴正計劃到台灣讀art或修讀營養學，她笑說：「都想分享點解有興趣讀書，之前兒童節目啲小朋友好聰明，醒到個位令我覺得讀咗十幾年書全部白費，因為之前有個環節鬥快舉手答問題，佢哋遇到勁複雜數學題係秒答，我就啞口。」
場地提供：咖喱葉
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|