曾志偉的現任太太朱錫珍於本月3日在港養和醫院病逝，兒子曾國祥向傳媒表示希望低調處理母親的後事，昨日曾家於沙田寶福山紀念館地下寶福堂舉行設靈，今早再到大嶼山寶蓮寺進行法事及火化。
中午約12時，曾志偉與兒子曾國祥及兒媳王敏奕接受傳媒訪問，問到喪禮安排一切從簡低調行事，志偉表示是順從亡妻遺願，「我哋兩父子都希望跟返佢意思，因為佢本身都係一個好低調嘅人，而且而家都有疫情影響，唔想聚集太多人。」志偉表示妻子生前已經病了一段長時間，所以家人均已有足夠的心理準備。
曾國祥透露，母親生前希望海葬，並強調一切從簡，將來亦會擇日進行。志偉表示太太離世一刻家人都在場陪伴，「對佢嚟講已經有一個充份嘅心理準備，我哋亦都係，所以對我哋都唔算太突然，對佢嚟講都唔需要再痛苦，呢個過程裡面我哋最想嘅就係唔想佢有痛苦。」
曾國祥早前憑《少年的你》獲得各大電影獎項，可算是送給母親的最後禮物？曾國祥說：「我希望係啦，最開心嘅一樣嘢係同佢喺醫院睇直播，宣佈得獎嗰陣時佢係好開心，大家攬住喺度喊，我一路都話希望呢一份係我畀佢有史以來最好嘅母親節禮物，好感恩有呢個機會畀佢睇到我仲有少少嘅成果。」
問到志偉的心情，他表示哀傷是必然：「呢個就係人生，我哋屋企大家都係佛教徒，對生死大家都已經有個概念，生前已經將呢件事講得好清。」至於儀式方面，志偉表示一切已經順徒亡妻遺願完成，志偉表示因為太太生前積極做義工，故早已熟悉葬禮流程，而且很多寺廟聽聞後都一呼百應，強調所有事「順利、低調」完成，亦不會有特別的陪葬品。
結束訪問後，志偉與眾親友一同折返寶蓮寺享用解穢酒，更有為傳媒安排齋菜接待。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|