夢想唔係得個「講」字就有～
為咗目標或者心願，你可以去到幾盡？台灣藝人陳建州（黑人）日前宣布成為籃球職業聯盟執行長，不過要營運就一啲都唔容易，需要籌備資金就可能順利執行！為咗展現決心同誠意，佢忍痛割愛，賣走價值1,500多萬新台幣（逾4百萬港元）超跑，佢喺社交網上載戰車最後身影，留言：「做有意義的事，這一切都值得...」老婆范瑋琪就力撐老公：「以你為榮！」
黑人曾表示朋友同工作夥伴都覺得成立新聯盟呢件事太瘋狂，大家都勸佢要三思，佢話：「畢竟是這20年來大家最想卻又無法實現的夢，還有人擔心我會千瘡百孔、萬箭穿心！」有網民就笑言：「有人打球為買車，有人賣車為打球！」
而前港姐冠軍徐子珊早前就為咗追夢退出娛樂圈，不惜賣車賣樓離開香港移居外國！醉心學術嘅佢，獲得碩士名銜唔夠，更希望讀到博士級，繼續研究心理學，毅然放棄香港嘅一切去外國進修，重過生活！當時演藝事業做得有聲有色嘅佢，坦言做出呢個決定有掙扎過，不過真係好鍾意讀書！而至於咩嘢最唔捨得？佢就話係架車，唔會想返香港咁話！
愛狗之人陳彥行（行姐）養有5隻狗狗，當中有4隻更係領養！特別留意大陸流浪貓狗消息嘅佢，跨境領養咗3隻狗，其中一隻佢更特意飛到上海帶返嚟！為咗5個「仔女」生活過得好啲，願意豪花金錢買補健品！而早前「糯米糍」隻眼出現問題，佢更花近10萬支付醫藥費。而平時佢一得閒就會去餵流浪貓狗，之前佢仲出手救起小貓咪，但買糧都使唔少錢，佢不惜變賣首飾名牌捐畀慈善機構嚟解決開支，真係好有愛心！
來源 source: http://hk.on.cc
|
鍾意就快D Share啦！
|
|
|
