唯恐天下不亂的警隊再獻新猷，繼8.31一周年一名孕婦被警務人員箍頸推倒，辯稱「拉開」時不知道對方懷孕，在剛過去的星期日，一名12歲女童與兄長在旺角買顏料，慘遭警撞飛騎身膝壓，之後反被警屈「拔足逃跑形迹可疑」，更違限聚令被票控，引來全城嘩然，防止虐待兒童會更發表對警方執法關注。
撐警表忠的高志森近月沒有工作，常在社交平台做藍鍵盤打手，更被網民幫他改花名叫「低智森」，昨日他在facebook發表謬論指責受害的女孩與兄長，「去到暴亂區買文具？警方當日已經不停呼籲市民不要出旺角油麻地高危地方……成個下午又不停開咪呼籲市民唔好停留，兩兄妹十幾歲，聾㗎」，完全沒半點同理心可言。身在加拿大的鄭敬基即為小女孩抱不平，在IG轉貼高志森的帖文，斥責他的言論：「一個冇嘢做嘅所謂導演會點？可以點？一個盲咗嘅人嗌人『聾㗎！』；一個心黑咗嘅人，用彩色底去粉飾去煽動仇恨！唔識分『高危』係因為你所講嘅「警方」去到邊、邊度就變高危所至，唔通市民就唔出街？」
鄭敬基更指高志森以女童事件表忠，他說：「林鄭『已經不停呼籲市民』做健康碼，就嚟七張嘅你做咗未？一個連12歲女仔都拎去消費表忠嘅你，你都就嚟七十，仲想要啲乜？人生七十古來稀，呢位你快做健康鹿！呼籲咗好耐，聾㗎？」今日凌晨，鄭敬基在facebook開live，繼續狙擊高志森的言論尖酸刻薄。他未有否定高志森在80年代的電影成就，認為他人到70歲好似「689」梁振英般搵存在感：「人去到70歲，唔難想到689，佢冇咗一份前特首工作，冇咗一個身份，縱然佢喺國家級有個title，唔會令佢忙，佢就去睇吓邊啲人去落咗邊個廣告，點解落喺《蘋果》，提醒人去針對，所以今次高志森係咪想好似689……大家都係各為其主，我哋係為民主，佢哋係服侍嗰個主，冇存在感，唔高知名度……話警方叫咗人唔好出去，不如佢哋宣佈戒嚴，如果香港人連去一個地方都冇自由，講自由唔得，唱歌又唔得，擺一個post又唔得，佢拎一個彩色背景去講就唔係仇恨，見到件事可以幫香港政府、幫國家講兩句，最恐佈係佢講兩兄妹十幾歲，聾㗎？」
鄭敬基提及早前孕婦被警察推倒事件，之前那班撐女權的女星忽然「失蹤」，他表示：「孕婦之後，好多人問女權嘅藝人去咗邊？平時為女權發聲，保護婦孺、細路仔嘅藝人都唔出聲，我哋心裡面都好唔開心，明白你哋有難處，平時唔好講女權，唔可以揀自己方便時發聲，好多慈善機構講幫細路仔工作嘅機構，點解唔出聲，平時唔係講救急扶貧？林鄭喺記招被記者問呢個12歲少女，問到警力執法唔妥當，佢都唔敢講，因為講出嚟冇血性。」鄭敬基更點名一眾撐警人士如陳百祥、鍾鎮濤、何君堯等人都未敢出聲，指高志森就為政府解話是有動機目的：「生活太沉寂，又冇戲開，又冇劇開，感情生活又空白，如果唔係佢身邊有咩伴侶，係覺得一個12歲女仔被警察撞低咗冇問題，『聾㗎』係抵嘅，你咁樣做係咪得到好多share，藍絲向你敬禮、護旗都唔夠，要幫國家拆招，幫林鄭拆招……各個界別的KOL想出位，背後有個目的，返中國有新project，有戲開有工作，用一個12歲女仔做marketing，可恥。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|