香港現場演出及制作行業協會與大灣區共同家園青年公益基金共同制作，共16集的網上直播音樂節目，敖嘉年與歌莉亞今晚將打頭陣演出。大會今日在觀塘舉行啟動禮，協會主席何麗全及基金副主席霍啟剛在會上致辭，劉浩龍、天堂鳥及黃劍文等有份參與節目的藝人亦有到場支持。
最近致力建立「貼地KOL」形象的霍啟剛，在會上叫大家不要再稱呼他為「霍生」：「叫我Ken得啦。」他更罕有接受記者訪問：「好興奮，好耐冇見咁多人。」記者笑指他近日忙住買餸、做KOL，霍啟剛說：「忙屋企嘢，其實都幾困難，而家要用zoom上堂，大嗰個都懂，細嗰啲點可能坐定定，辛苦太太要download功課、print功課，安排佢哋啲時間，有時上堂時間撞咗，佢哋三個惟有一人一個角落頭。我同其他家長一樣，想快啲可以返學，始終小朋友都想要群體生活，佢哋都有話想見同學仔。」
提到這次合辦網上音樂節目，他說：「我知道好多人都手停口停，而家想睇下online、offline點樣結合，睇下係咪可以做多少少嘢，我哋基金係服務青年，好多新晉歌手都支持。」問霍啟剛可會在音樂會上開金口？他笑謂：「我係歌唱素人喎，個女有主動同媽咪講想學唱兩句，都有喺屋企唱，不過3歲咋，都係唱《Baby Shark》嗰啲。」記者提議他與太太、囡囡合唱，他笑言：「咁都畀你諗到。」至於會否趁疫情期間再添寶寶？他說：「冇諗，太太已經好忙。」
至於基金以「大灣區」命名，問到他可會擔心令香港年輕人反感？霍啟剛說：「唔係呀，咁香港真係大灣區入面，我哋係服務香港年輕人，大家唔需要睇個名。我哋想搞啲年輕人喜歡嘅活動，好似KOL訓練班，呢個只係地域，香港、澳門都好，邊度有機會就去邊度。」
由於武漢肺炎疫情，演藝界活動幾乎全面叫停，劉浩龍早前亦加入網上直播行列：「我都有做過online show，之前喺上海隔離都有開live，原本諗住返到香港隔離完就開戲同宣傳，點知又遇到疫情爆發。知道自己隔離完14日都冇得出街，進入咗頹廢階段，加埋生日周，搞到6嚿變返2嚿。」他表示現時已操弗，接下來將為新歌宣傳。問到有否趁疫情期間，以交友app識女仔發展新戀情？劉浩龍即笑問記者：「有冇好介紹？」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
來源 source: http://hk.appledaily.com
|
鍾意就快D Share啦！
|
|
|