很多人說，喜歡「北漂」後回來的傅穎（Theresa）。因為，她變真了。
Theresa在17歲時便做兼職模特兒，其後加入女子組合Cookies正式闖娛圈，餅女九變四，Theresa與鄧麗欣、楊愛瑾及吳雨霏幸運留低，四女在2005年嘗試單飛發展，上位期間是非多，Theresa也爆出整容、走音、黑臉、寸爆等負面新聞。面對演藝事業低潮和感情挫折，Theresa受羅仲謙情傷一役打擊，失意離港尋出路，「北漂」4年，沉澱後造就了「傅穎2.0」。
Theresa回想早年去北京發展，無依無靠，普通話不靈光，不敢外出，事事不如意，克服過渡期，她反而覺得外闖能擴闊眼光，「記得有次同一位內地演員傾偈，我講到喺香港時好多負面新聞，對方話好恨，佢認為有人報道、有noise，代表仲有新聞價值，大家有日唔想睇你，連負面新聞都唔會有。」Theresa馬上開竅，不再耿耿於懷。Theresa早年壓力爆煲患上抑鬱症，「見到人多，想嘔、想喊，成日唔開心，匿埋屋企唔想出去，望窗睇唔到自己將來，只係諗到一世咁過，仲有乜意思？成日聽到有魔鬼同天使兩把聲音同我講嘢，意志唔夠堅定好易被洗腦，我嗰時靠睇好多心理書，強大意志抵抗負面情緒。」
北漂讓Theresa學會獨立，「嗰段日子，我一直維持單身狀態，每日自己鋪床，黐走貓毛，我發覺有個舒服屋企，有瓦遮頭，應該要感恩。」Theresa不再執着，感受知足常樂，「北京返港，掉低咗以前嘅自己，成個人開心咗，我鍾意而家嘅自己。」再見Theresa，她已變得豁達率性，經常笑臉迎人，「以前好多人對我第一印象係難相處同好寸，話我講嘢唔真，我想講其實我講嘢不知幾真，只係自己唔識表達。我以前又乜都care，介意人哋睇法、眼光同評價，所有嘢喺我嘅中心，嗰段時間好消極，困入死胡同。我以前係完美主義者，太保護自己，上台跳錯一個step，落台會好唔開心，話我唱歌走音，好想用刀插自己。心情緊張把聲就緊，走過一次音，我下次上台仲驚，覺得全世界等睇我笑話，思緒不寧，惡性循環。」其後在內地演出順利才重拾自信，Theresa也想通：「每個人都有優點缺點，自己都唔例外，應該接受一切。」
事業和愛情雙失的日子，Theresa曾萌退出念頭：「2013年公司安排我第一次返內地，留咗半年都冇嘢做，我就諗不如退出喇，反正性格都唔適合娛樂圈，當年咁啱有人話想搵我轉行做飲食工作。」最終轉行想法不了了之。現在全新的Theresa凡事隨心，對演藝工作，比出道時更有衝勁和熱誠。
Theresa前年與蒙古男友分手後，感情生活都交白卷，不過，她已準備好迎接一段新關係，「我唔抗拒拍拖，亦唔心急趕尾班車結婚生仔，我要等一個合適嘅人。」Theresa隨緣：「啱嘅人可遇不可求，廿幾歲同男仔拍拖，有激情、有火花就一齊，實際未必好了解對方，所以好快因了解而分開。人大了會理智，希望同對方先做朋友，互相觀察溝通，睇吓大家係咪適合先開始。我未必知最鍾意男仔邊個type，不過就一定知最唔鍾意邊種，尤其三觀唔同，好難last long。兩個人唔再係細個咁柴娃娃，要諗將來啲。」今日36歲牛一的Theresa，每天會保持30歲的心境和狀況去等愛，過去情史，她早放下羅仲謙這段不愉快經歷，Theresa淡然說：「每個人都有過去，過去係經歷，經歷造就成長，先有今日嘅自己。」
入行18年的Theresa，過往負面新聞不乏被指「變臉」，她聽到這個問題先自嘲，「我一定係冠軍，十年前開始俾人寫。」她解畫：「我落咗妝個樣同以前差唔多，我俾唔同人化妝，就有唔同效果，呢幾年我都自己化妝多，深明化妝、畫畫、演技、煮嘢食都講求創作，樣子變化可能出於技術進步咗，我好細個已知自己點化好。」不少藝人用醫美變靚啲，Theresa不抗拒：「做幕前keep住好狀態畀大家睇，係工作性質，微調唔係大件事，呢樣嘢普及同流行。將來我塊面多咗皺紋爆出嚟，觀眾望住唔舒服時，我到時可能要考慮呀！」
訪問當日，「傅穎2.0」全程笑不停，樣子也變得隨和，「以前我點樣？係咪成日黑口黑面？我唔係好記得，可能以前太緊張，強顏歡笑，就笑得僵硬，而家心情平和，冇大起大落，保持住好sweet狀態，真係笑多咗！」Theresa會用「純粹」形容全新的自己，「純粹」有純正不雜的意思：「人越大越唔想諗咁複雜，凡事諗得簡單啲，自然開心。」Theresa回港後接拍首套劇集是ViuTV即將首播的《熟女強人》，她覺得自己是熟女抑或強人？「我係『熟女』好多年，咁我又係『強人』，我好tough㗎！」Theresa在劇中跟吳千語有SheShe戀，但現實生活，她仍然期待猛男出現：「我未必會喺同性身上找到想要嘅嘢，我仲想有個胸膛去依靠。」
撰文：比華利
攝影：沈健程
攝錄：廖達燊
場地：FAM囍公館
髮型：Zap Tang @Essensuals Toni & Guy HK
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|