譚炳文上周六（9月5日）因肺癌與世長辭，香港開電視及環星娛樂製作為炳哥製作《舊歡如夢譚炳文》紀念特輯，邀得尹光、黃夏蕙、苑瓊丹、吳浣儀、黑妹、劉錫賢及鍾叮噹等炳哥的好友，分享與炳哥相處的點滴，今日他們在觀塘拍攝，炳哥女兒譚淑瑩（瑩瑩）亦有出席。
瑩瑩、資深電視製作人楊紹鴻、香港開電視董事總經理陳永孫及環星娛樂董事總經理張國林一同受訪，楊紹鴻表示與炳哥相識逾40載：「炳哥同琴姐（李香琴）第一個演唱會我都有幫手，今次都想盡啲綿力。」張國林指環星有份參與製作感高興：「我哋同炳哥結緣，到呢個特輯，係一個完美嘅句號。我同炳哥識咗超過廿年，大家都好老友，希望最後呢個節目做得好好睇睇。」
他向瑩瑩送上炳哥已絕版的98年演唱會DVD作為紀念，瑩瑩說：「多謝大家出席，呢個演唱會（98年）係我第一次畀傳媒影相，因為自己嗰時好想上台送花，仲俾傳媒追咗幾條街。」瑩瑩表示不會在紀念特輯上開金口唱爸爸的歌，她感觸地說：「今次有咁多爸爸嘅好友唱，我要學好啲歌先，我答應過爸爸，有機會唱歌嘅話，我會唱哂佢嘅歌。」她透露炳哥的葬禮已確定於21日舉行，由於疫情關係，追思會與設靈會同日舉行：「嗰日會喺靈堂誦經，下午5點設靈，晚上7至8點係追思會。」
而久未露面的鍾叮噹，透露農曆新年期間曾與炳哥見面：「因為我同瑩瑩好熟，同埋炳哥都係義工隊成員，炳哥唔講錢，仲自己出埋車費，佢同瑩瑩都好有善心。」鍾叮噹1986年參與《歡樂今宵》時認識炳哥，她大讚對方是全能藝人：「流行曲、粵曲、電視、電影都好出色，仲有配音。炳哥好鍾意賭馬，直頭可以成精，做埋馬評家，所以佢應該係6項全能先啱。」她指炳哥的身教及言教亦很好，從來不發脾氣，亦不會講是非，提攜後輩：「我祝瑩瑩要堅強，爸爸會一路睇住佢。」
而炳哥與琴姐的契女黑妹，透露早於10多年前認識炳哥：「我唔鍾意叫契爺，所以一直叫佢老竇，因為契媽琴姐，所以識老竇。老竇對後輩好好，喺佢身上學到做人、待人接物同做舞台。老竇一路好走，永遠懷念。」至於琴姐是否已知道炳哥離世的消息？黑妹說：「佢應該知道，而家琴姐喺屋企休息，現時疫情咁更加唔可以去探佢。」至於早前証實患癌的她，精神甚好：「而家好返8成，進步中。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|