林作近期不但「惹火」，而且「火氣」好猛，為賣保險處處辣火頭，為保女友裕美，義無反顧和網民開火，就連買套西裝，亦成為話題。可是，哪怕你日日鬧，作為當事人的林作，似乎不痛也不癢，加上幾乎每隔幾日便有新聞曝光，在偷換概念上，trouble maker亦是attention seeker，宣傳策略上，林作是成功的，起碼現在全香港有不少人都知林作是一位保險從業員。
林作招兵買馬瞓身賣保險，相對來說，他的另一門生意卻低調得多，所講的是林作在IG經營的二手名牌店生意。IG賬戶打正旗號叫「林作站」，用得自己個名起朵，那份自信可想而知。林作日前接受《蘋果》專訪說：「其實個名用林作站，就係一份認可，即係如果你好唔鍾意我呢個人，基本上就唔會買，連follow都唔會，相反，如果你對我有信心，覺得我唔會呃你，你自然會幫襯。」
阿媽係名店大水魚
林作這門二手名牌袋生意，其實最初只是無心插柳，訪問中，林作自言遺傳了媽咪Lily的購物狂性格，多年來買落不少「唔等使」的隨身物，他說：「呢方面媽咪係誇張嘅，我曾經追一個喺名店做sales嘅女仔，佢話我知阿媽係舖頭入面最大嘅水魚，呢方面我好似佢，結果買落唔少西裝、皮鞋，加埋都過百件，有啲甚至未着過，真係攞嚟擺。」為免閒置，林作學識「斷捨離」，實行開post賣出去，結果反應出奇地好，連林作媽咪亦託阿仔幫手賣自己的手袋和飾物，反應更佳，引來身邊朋友關注，又將自己的名牌物品拿出來，放在這個平台上，林作這盤生意便逐漸成形，做了短短3個月，IG followers已超過4,000人，而且人數還持續地增長。
秒賣熱門item
林作說：「呢個生意真係撞正喺呢個疫情時間，大家社交活動少咗，多咗人上網睇嘢買嘢，托賴頭兩個月已經淨賺30、40萬，基本上係接唔晒啲貨，而我哋唔想整衰個名，所以把關呢一個程序會好小心，只要件貨有doubt（懷疑）嘅我哋都唔會做，亦因為咁，我哋拒絕嘅貨量好多。而家做熟咗，已經有經驗，某啲牌子某啲款係會快走啲，咁我哋先做，至於其他冷門嘅，我哋就未必會收。」林作指某類牌子和款式，試過一放張相上網，1分鐘內已有超過10個客打電話搶購，而他的宗旨是誰先過錢便會快者得。
做二手名牌生意，信譽和客人信心很重要，林作作為前大律師，名氣加上財氣，似乎有利於他這門生意，他亦笑言幫襯的客人除了畀錢購物外，還要求一個特別的「售後服務」：「老實講我形象同名牌真係唔多夾，我喎，似諧星多啲啦，最神奇係你買袋，但就要求要我嘅即影即有簽名相。試過有個客連買4個袋之後，WhatsApp我話爭佢4張相，見佢買咁多，送裸照都得」記者打趣說客人要林作的自拍相，可能是用來掟飛鏢，他大笑：「可能都係！」
最難搞有心理病顧客
開網上店，林作指雖然賺到錢，但亦非一帆風順，自覺最棘手的，便是要招呼一些有心理病的顧客：「有啲客，無論你件貨係點，太新佢覺得係假嘅，舊嘅就一定入過棺材攞出嚟，佢總係有理由。好似我賣CHANEL嘅Vintage款，有客人買完會同自己個新款CHANEL比，咁係冇得比喎，老爺車點同架新款跑車比？又試過有個客，因為某張保證卡上嘅某一點花咗，佢話張卡有問題，其實啱啱開始嗰陣，我哋真係會畀錢人攞去驗，但後來我發覺呢啲人本身係有問題，而呢個情況幾乎每個禮拜都有發生，我同助手有一排情緒好低落。試諗吓，我哋第一個月賣咗80幾件，而家total items幾百件，我畀你有200、300個回頭客，200個裏面如果有一成係咁，都玩死你！」
林作指客人買完貨品後，如果唔鍾意可以退貨，但他對某種顧客是不能容忍和姑息：「如果個客係屈我哋件貨係假，而要退貨，我係絕對唔會接受，因為呢個係我哋聲譽嚟，你出去同人講話我賣假嘢，尤其我擺咗咁多事前工夫落去，唔肯接好多貨，或者接咗件貨，見到唔放心都唔擺上網賣，你仲要屈我哋呢件嘢係假嘅，咁我覺得係辜負咗我哋一番努力囉！」
撰文：王梓嫚
攝影：仇志德
攝錄：林賓尼、馮嘉銘
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|