2020年9月18日星期五

【好認真】挑戰《你還好嗎》泰國篇胡慧冲一句簡單對白重拍80次

「泰國通」胡慧冲於TVB今晚播出的《你還好嗎》「泰國篇」探討喺疫情下曼谷市內情況，包括空虛嘅曼谷機場。

新冠肺炎疫情衝擊全球，各地遊遊業都進入寒冬，由張志明監製嘅TVB專輯節目《你還好嗎》，走訪世界各地報導疫情如何影響當地民生和經濟。而今晚及下周一晚嘅「泰國篇」，就搵嚟有「泰國通」稱號嘅居泰港人胡慧冲(Roger)拍攝。Roger接受頭條日報訪問時，形容今次對他來說係好大挑戰，因為平日喺《沖遊泰國》系列嘅旅遊節目都習慣用輕鬆搞笑手法嚟拍攝，會搞吓爛gag，但今次要收起嬉皮笑臉，一本正經演繹，提供正面資訊，最高峰，試過一個好簡單嘅對白拍足超過80次，算係拍TVB節目以嚟最認真嘅一次。

Roger說：「7月疫情最嚴重時，我都有不停拍片，拍吓市面情況，放喺YouTube自家頻道播出，當接獲編審岑應邀請，手頭上嘅資料就大派用場，絕對夠用。由寫稿到拍攝，岑應亦任我發揮，所以不容有失都有壓力，就算一句簡簡單單對白，都要求不停重拍30次到80次不等，幸好出嚟效果好滿意。」

今次主要探討喺疫情下曼谷市內情況，包括翟道翟週末市場、當地五星級酒店優惠安排、訪問香港人娶咗泰國人妻家庭、居泰港人等狀況，拍足5日，相當用心。由拍攝至今經已相距兩個月，Roger話𠵱家泰國市面基本都回復正常，馬照跑，舞照跳，派對照開，啲人照出街，戲院都開返。而泰國人好自律，個個都帶口罩。但經此一役，他體會到原來好多嘢都唔係必然嘅，所以要好好珍惜，正如以前咁，他可以好隨意咁買機票返香港，做完嘢，探完家人就折返回，相當方便，𠵱家有8-9個月冇返屋企見家人，之前封關時，就連簡單坐底飲杯咖啡都有困難。

之前播出TVB資訊節目《這麼遠，那麼近》泰國主題嗰集，方東昇本應預咗Roger幫手拍攝，安排他坐吓電單車、搭船等，點知Roger乘坐助手嘅座駕，因為爆咗呔加埋大塞車搞到姍姍來遲，最後只能變咗過鏡式演出，他除了可惜及感到不好意思外，再一次領悟到多嘢都唔係必然嘅，所以要好好珍惜每個機會。