黃店做唔住
香港有唔少黃店，但圈中人開嘅，少之又少，嚟嚟去去只噏得出譚小環間「渣哥」。其實，吳啟華阿哥、《大時代》丁蟹個仔旺蟹吳啟明，據聞佢嘅餐廳「慢煮兩餐」都曾經響應反修例罷市。不過，57歲吳啟明話：「手上已沒有任何食肆。」黃店都做唔住？
- 「慢煮兩餐」已在8月結業。
氣氛混亂，執埋大陸舖
吳啟明拍完《大時代》丁旺蟹一角，覺得戲份少又無乜對白，咁多年都係演閒角，心灰意冷之下離開娛圈。之後，佢神隱26年，期間曾向韓國大師鑽研廚藝。直至2018年，「慢煮兩餐」開業並親自下廚，吳啟明終於蒲頭，並透露另外有兩間食肆喺內地，亦擔任中環餐廳「Around Wellington」嘅顧問。不過，本刊同吳啟明通電，發現原來佢名下餐廳，已經全部結業。上環嘅「慢煮兩餐」，一來受疫情影響生意唔好，二來租約期滿，所以喺剛過去嘅8月份已經無做。至於內地餐廳，吳啟明講得隱晦：「內地那些一早已沒有營業，疫情剛開始已沒有做。總之覺得氣氛混亂，又距離香港、自己很遠，去不了，不如就不做了。」對於一個曾經支持罷市嘅人而言，內地生意，關門大吉較為穩陣。
計畫疫市開外賣店
其實，吳啟明嘅廚藝，得到好多圈中人欣賞，唔單只親細佬吳啟華食到舐舐脷，連《大時代》嘅老竇兄弟都會幫襯（鄭少秋、邵仲衡、陶大宇和郭政鴻），據聞藍校長譚詠麟、吳君如同爸爸夏春秋一家人都會去食飯。因此，唔少圈中朋友都叫吳啟明繼續做，盡快開新餐廳！事實上，佢一早有晒全盤計畫，亦都物色緊新舖。「我正在考慮開多過一間店舖，但現階段先開一間，不是餐廳，而是外賣店。想法是主打一種醬汁，譬如豉油汁，而小小的店舖只賣豉油汁搭配的產品，例如豉油雞翼、豉油鴨腎，總之就是豉油系列。第二間便打算是客人都愛吃的甜酸汁，這個甜酸汁又可以煮很多東西出來。即是我將『慢煮』裡面的菜式分開一間間小的外賣店，就是這計畫。」吳啟明說。
- 吳啟明調配秘製醬汁開外賣店。
6分店各有秘汁
關於吳啟明離開娛圈後，有傳佢過住「三更貧五更富」嘅大上大落生活，富貴時家住半山豪宅有保鑣隨行，運滯時曾因炒股欠債過千萬，又試過被人街頭伏擊。向好嗰方面睇，吳啟明見慣風浪，諗法自然與眾不同，較易「突破盲腸」。好似疫情之下，飲食生意叫苦連天嘅聽得多，但倒轉話藉疫情發圍嘅真係無聽過，吳啟明就係少數認為有危就有機，疫情可以幫佢用最低成本賺錢嘅人，佢話：「因為外賣店的主要功用就是，第一租金便宜，現在很多空置舖位，租金便宜。第二薪金便宜，現在的薪金也下降了。第三，因為外賣店空間要求細，開設成本亦都細，不用裝潢又沒有堂食食客。而且針對疫情，外賣店的生意會更好，因為人人都買外賣回家吃，而不是坐在餐廳吃。
「第一檔，是比較小型製作，我會為店舖安排食譜配方，在工場調好醬汁，我本身已有工場，然後運送至店舖做試點。如果試點滿意、成功，我會調較第二種醬汁用於第二個試點，就是這樣。其實我已研究了大約6款醬汁，所以可以開6間店舖。」
5女歌手爭唱吳啟明作品
吳啟明諗頭多多，準備疫市大展拳腳，但佢並無忘記自己另一興趣——音樂。相信大家都有耳聞，向來自信滿滿嘅K-Pop，極少機會睇得上外地歌曲。偏偏，李棟旭主演嘅韓劇《觸及真心》片尾曲就揀咗吳啟明創作嘅《Falling Down》。加上2019年開始，連續兩首同J.Arie合作嘅《This Baby》以及《I'm Your Child》受到關注，吳啟明謙虛話：「因為上次，有了少少名氣，會作一首歌用於聖誕節，11月就會開始進行，今次有5位女歌手都想唱我的歌。」- 吳啟明有兩大興趣，一是烹飪，二是音樂。李棟旭主演的韓劇《觸及真心》片尾曲，就是他的作品。
女友在大陸久未見面
吳啟明有助手，出入亦有司機，興趣變成生意開餐廳，每年又會作下歌，相當美滿，唯獨差個伴。57歲吳啟明，聽講有位拍拖約5年嘅女朋友，但講到結婚，佢話未有計畫，況且疫情下，連同女友見面相處都做唔到。「因為她在大陸，相處不了。」所以大家唔好誤會，畫面中女士並唔係佢女友，只係助手。 ----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|