「配音王」譚炳文上周六因病離世，早前他接受好友楊紹鴻與江美儀的電台節目訪問，是炳哥生前最後一個訪問。期間大談他入行至今的經歷，炳哥聲如洪鐘談笑風生，提到往昔在娛樂圈的日子，他不時開懷大笑，更謙稱成世冇紅過。
原為賣金飾的炳哥，在報章看到麗的呼聲招募播音員：「咁易考咩？麗的我衰咗，1700幾人考揀10個，我係第11個，後黎打嚟叫我做旁聽生，咁咪去聽吓囉，個個坐埋一齊，我坐開一邊㗎，幾陰功。」後來一次機會獲寧靜邀請聲演播音劇第二主角：「直出㗎，嚇到腳都軟，幾晚瞓唔著。」
談到他如何加入電影圈？炳哥憶述當時參演播音劇《改造小姐》反應甚好，吸引電影公司買版權拍成電影，炳哥獲邀擔任主角。楊紹鴻笑指他甫入電影圈便做主角，炳哥笑謂：「我冇捱過㗎，一嚟就做主角，都係運氣啫。」雖然是主角，但炳哥初時在片場亦曾遭白眼：「畀套唐裝衫我酸酸宿宿咁，嗰時都唔知自己做乜。套戲反應梗係好，我有運，搵親我嘅多數都賺錢。對我嚟講，（戲）有咩好唔好吖，觀眾鍾意、收得就係好，我都唔知咩係藝術。」
炳哥與性感艷星狄娜曾合作多齣色情片：「嗰時粵語片式微，其他片冇得開，得佢有錢搵，所以咪拍囉。」主持問他當年面對尤物狄娜可有反應？炳哥說：「佢剝哂衫我都見過啦，不過我冇反應、冇興趣，拍劇（與現實）唔同㗎嘛。以前拍接吻戲都係借鏡，我地嚟真，佢又唔介意。」他指拍攝電影，曾有數十個女仔全裸拍外景，炳哥笑謂：「咩都試過哂，好好身材試過，好核突身材都試過。」楊紹鴻指現時的藝人與以前很不同，炳哥直言現時的藝人「唔旨在」：「話佢，佢隨時唔撈添呀，而家都唔同世界，以前啲人純好多，個個都係捱出嚟。」
講到炳哥最愛賭馬，他指當年拍戲曾在馬上跌下：「隻手甩咗跤，咁拍戲同賭馬唔同。咁賭馬有咩唔好啫？好過打麻雀啦，我贏你啲錢你啲錢，傷感情，我（賭馬)問馬會攞錢之嘛，我係第一個喺香港講馬㗎，講沿途賽程。」炳哥自爆曾為政府拍攝戒煙廣告後悔，笑言初時只為賺錢，但因為廣告中呼籲大家戒煙，煙草商不再找他拍廣告：「我真係後悔，不過後來政府都禁（香煙廣告）。」
江美儀指炳哥的演藝生涯順風順水，他亦坦言未曾嚐過低潮：「而家最困難，因為啲神經線畀啲骨刺拮住，行多幾步都痛，唔行得。喺屋企對住四幅牆好悶㗎，最叻都係搭的士去飲茶，而家唔係話搵錢，喺屋企坐得耐仲痛，（開工）行住反而冇事。」炳哥直言自己很放得開，無論做主角還是特約演員都接受，但因身體狀況，已推卻多個演出機會。
他勸勉現時的年青藝人，最重要是肯捱：「勤力、咩都學吓、肯捱、肯做，唔好得罪人。」炳哥直言曾被年青演員藐視：「我提佢嗰句嗰係咁講，佢矋住你㗎，所以我而家咩都唔理，最緊要做好自己收銀紙。」
訪問尾聲，炳哥直言對人生無悔：「好彩就有2、3年，我冇悔呀，咩都食過、咩都嘆過，最緊要仔女安安樂樂，我盡頭㗎啦，唔好再捱、唔好再辛苦。多謝朋友、親戚，對我非常好。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|