孔子曰：「四十而不惑。」
還有4個月，關智斌（Kenny）便要迎接「39+1」，訪問這天問他有甚麼人生大計，Kenny一臉不惑，相信隨遇而安。他堅信每天都做好準備，當機會來時就能發揮所長。
天生童顏的Kenny坦言近日常被追問怎樣迎接40歲，「近日多咗人提我，好似好隆重其事咁，令我都諗一諗係咪要搞個大壽？我其實對年齡冇乜概念，成日唔記得自己幾多歲，好多人覺得30歲要成家立室，40歲要事業有成，50歲要有人生目標，60歲就退休。但我冇特登去用歲數框住自己，我覺得隨心啲，咁先活得enjoy，同時保留一顆赤子之心。我都係之前先學滑水同結他，冇諗過呢個歲數唔去學得，唔通50歲人生就乜都唔學，乜都唔做？反而keep住赤子之心，對每樣嘢都會有新鮮感。」
Kenny表示以前細個會給自己年齡立下框框，人大了，他才發覺一切不似預期。「好多嘢冇得plan，即使有個dream喺度，幾時可行到過去，某程度上唔係完全自己控制，身邊太多嘢會影響到，自己思想都會改變，我唯一唔變嘅係決定呢刻做自己應該做嘅嘢。有人可能覺得我而家做嘅嘢徒勞無功，但冇人知將來，可能有一日回報就出嚟，呢幾年我就親身體驗得到，所以，每一日都要做好自己，做多啲運動，增值自己。」
4年前有報道指Kenny和張敬軒由「密友」降呢變朋友關係。近年，Kenny不但習慣單身，還享受單身。步入中年感情觀會改變嗎？「好多人會覺得35歲要結婚，但我嘅mindset（心態）冇話要有年齡限制，而家幾enjoy一個人，自己住耐咗，偶爾係會有寂寞感覺，但未必唔好，我只係選擇咗單身狀態，而唔係單身選擇咗我。」Kenny指自己的心態跟不少都巿人一樣，每人營營役役投入忙碌工作之中，尤其那些曾經深愛過的人，嘗過戀愛模式，也受過傷，未必願意再花時間精神投入發展另一段新感情，「要調返去戀愛頻率，其實要花好長時間，唔想再傷心同付出，所以，我會喺受傷害之前『落閘』，我會走先。」
Kenny知道自己要追尋一段怎樣的愛情，但知易行難，寧願卻步、選擇單身。他續說：「我暫時係咁心態，有啲攰，知道發展一段關係，係好甜蜜，但中間要磨合，我就少咗耐性。大家一旦dating，好驚超越界線（指由朋友關係升呢變情侶），我就會變成一隻兔仔，一驚就走咗去，反應好過敏。」Kenny笑言新歌《乾爹》正是自己心聲。他亦留意到身邊同年紀友人都有着這個心態，大家興玩交友網解寂寥，建立虛擬愛情取代真正拍拖，友人還游說Kenny加入玩埋一份，身為公眾人物的他即使心思思都未有實際行動，他卻自爆曾借用友人的交友App滿足好奇心：「純粹做research，我攞朋友個account玩吓，原來幾過癮，幫佢like咗人，嗲咗幾句，我用人哋身份，冇得代入，只係亂玩吓，整蠱朋友多啲，講吓I miss you，冇包袱，唔會約出嚟。」
家中唯一兒子的Kenny可有被家人催婚？他說：「我30歲時有催過，而家佢哋放棄咗，冇再問我，反而係問我出咗家用未，佢哋一問，我就答『得喇，我畀多啲家用』，自己真係唔心急。幾enjoy而家生活狀態，拍拖嘅嘢冇得plan，要遇到一個人令我有心動嘅感覺，其實唔容易，當人越來越大個，而家都唔知鍾意啲乜，起碼知自己唔鍾意乜，我唔鍾意一啲唔積極嘅人，或者人哋都有唔鍾意我，人揀你，你揀人。」
Kenny回想2003年被英皇揀蟀入行，戇直青年經過17年磨練，收穫豐富。「最大唔係拍過乜嘢電影，唔係出過乜嘢騷或者專輯，反而覺得呢17年，有嘢嚟，有嘢走，有嘢得到，為我攞到好多人生經驗。以前出道時戇居居，儍更更，到而家嘅我有生命力咗，對人對事感覺多咗，呢個係最大得着，係成長經驗。」
其實陪着Kenny長大還有辛酸和淚水，他回想3年前到橫店拍劇，開工期間接到飼養了15年的愛犬死訊，當時正在化妝的Kenny立即崩潰淚流披面，「好嬲自己陪唔到愛犬最後一程，劇組導演知道後，佢調動咗我啲戲，畀我返咗香港安排愛犬身後事，呢件事令我真正感受到生離死別。始終未ready好心情，暫時唔敢再養寵物。」
Kenny先後出過三本寫真集，記錄成長歲月，包括2003年的《Boy’z 2gather》、2006年的《尋找美惠》和近日推出的《尋蝶戀花》，由青澀到成熟，「以前嗰啲係青蔥歲月，好baby fat，嗰時滿臉骨膠原，而家冇咗就冇咗，嗰時有陣青澀味，嗰種感覺同眼神，而家點扮都扮唔返。而家又係另一種感覺，後生時要扮而家又唔得，新呢本寫真集係成長紀錄。」可打算半百時再出一本留念？Kenny答：「而家問我『49+1』出唔出？未必喇，或者到時用第二啲嘢紀念。」
撰文：比華利
攝影：沈健程
攝錄：廖達燊
化妝：Elaw Wong of thelook-studio
髮型：SingTam ofpi4.hk
服裝：DEMO、Sandro
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|