林曉峰與康子妮突然結束18年夫妻情，離婚消息震驚娛樂圈，有傳黃翊是兩人之間的第三者。黃翊今日現身其在大埔經營的茶餐廳，心情輕鬆接受訪問：「其實我係噚日開緊工，有2位記者嚟搵我，最近疫情多數訪問都係講吓疫情、做生意啲苦況，問問吓佢哋口塞塞、好辛苦咁問我。我聽到都好突然，因為我冇聽過佢哋離婚嘅消息，話我係第三者，真係好奇怪。」
黃翊表示與康子妮2年前認識，當時兩人在同一錄音室工作：「我以為佢淨係拍劇，後來大家傾偈，就邀請佢擔任MV女主角。因為我年紀唔細，唔想搵個太後生嘅，見大家都有家庭同小朋友，係成熟嘅人，於是就搵佢，2、3個月後就正式拍，呢件事就係咁。」他坦言拍完《愛到底》MV，大夥兒慶功後便未有聯絡：「唔怕老實講，真係冇咗聯絡，亦唔會聯絡，費事對雙方都有影響。」
問他與康子妮言談間，有否感覺到她不開心？黃翊笑謂：「未傾到咁深入階段，我自己都搲晒頭，點解會咁樣？我知好多記者去舖頭搵我，咁我又唔想影響舖頭做生意。」
有指康子妮是他的fans，黃翊聞言笑住表示：「好多人都係我fans，係好嘅，咁我啲歌係好聽㗎嘛。」至於太太陳存正可有因此不快？他說：「哎呀，我屋企嗰件身體唔係咁好，同埋女人點會覺得冇嘢呢？不過佢都同我講笑『你呢個年紀仲有market』。」記者笑言昨晚回家有否跪玻璃？黃翊笑指：「我哋唔興跪玻璃，最多都係藤條，哈。不過我哋真係完全冇嘢，佢腎有事，平時我有時間都會接送佢，所以噚日報道話我補鑊接老婆，呢句說話唔公平。」
他表示幸好太太信任自己，至於會否覺得自己無辜被牽連？黃翊說：「唔係無辜，係摸不著頭腦，會唔會有人影到個類似物體認錯？」黃翊自行分析，由於最近在網上直播唱歌，曾收到負面留言：「話我唱得難聽、叫我收檔嗰啲，唔通係呢啲人整蠱我？但點解會係康子妮呢？我又諗唔明。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|