【零避忌】用煙花蠟燭整蠱細仔 喬寶寶唔怕食飛沫蛋糕
月前返港拍完電影《時代》及中印獨立電影《我男友係好差》，喬寶寶經已返回蘇格蘭「交人」，因為答應過，喺9月21日現身陪細仔「喬寶貝」慶祝17歲生日，呢個老竇果然守信用。細仔生日當天一家人開開心心，齊齊食印度餐，因為疫情關係，要嚴守社交距離，喬家分兩枱座，每枱規定大人唔可以超過6個人。
不過，一家人圍埋切蛋糕仍然相當溫馨，喬寶寶仲用潮物，煙花蠟燭整蠱囝囝，玩嘢話17歲要吹夠17次，蠟燭先可以熄滅。聽話囝囝好用力係咁吹，口水花噴晒喺蛋糕面，好搞笑，但喺疫情下，係人都怕怕飛沫喎！喬寶寶接受頭條娛樂訪問時就堅持話冇有怕：「怕咩呀？都係屋企人食返(蛋糕)啫！其實每次吹親蠟燭，一定有口水喺蛋糕度，不過，佢係特別吹得犀利嘅，唔緊要啦，等佢開心啲囉！」
由於細仔病行動不便，喬寶寶最想兒子身體健康，繼續活躍：「我都半退休囉！𠵱家多啲時間畀佢，同佢做運動，等佢健康成長。」
提到新冠肺炎毒疫情肆虐英國，當地單日確診人數持續上升，蘇格蘭格拉斯哥大學疫情更大爆發，而港府亦因應英國疫情惡化，決定將英國列入高風險地區名單。居於格拉斯哥嘅寶寶坦承自己好邪：「冇辦法，我跟住疫情走，當日香港大爆發時，我喺印度飛返嚟派口罩；到香港疫情緩和時，我就飛返去疫情最嚴重嘅英國；上兩個幾月前再返香港時，香港疫情再爆發，嗰陣時成個蘇格蘭確診數字係有史以嚟跌到最低，𠵱家香港疫情受控，相反蘇格蘭情況惡化，真係命裡有時終需有，命裡無時莫強求，所以都唔驚得咁多囉！」
來源 source: http://hd.stheadline.com
|
鍾意就快D Share啦！
|
|
|