其實阿嬌係秘密復工一日，為咗男拍檔可以入其他劇組。
藝人鍾欣潼（阿嬌）日前於內地廈門酒店房間暈厥倒地，頭撼雲石嚴重受傷，送院縫幾百針，上周三（9日）更指會6日後拆線，真係嚇親全世界！事隔多日，原來阿嬌已經靜悄悄「復工」，佢同劇拍檔張睿昨日（12日）就透過工作室社交網，貼出電影煞科合照，當中就見到阿嬌已拆去繃帶紗布，化上淡妝精神好，更借右手舉V刻意遮住受傷右額！
張睿工作室更發文大爆電影已煞科，指張睿好開心同大美女阿嬌合作，希望佢早日恢復，意外令阿嬌復工消息曝光！雖然未有見到阿嬌右額傷口傷勢，不過佢面露微笑兼完成拍攝，相信復原進度唔錯。
據知阿嬌前日秘密復工一日，因為張睿要入其他劇組，而阿嬌拍攝中嘅只欠一日戲就煞科，所以阿嬌帶傷上陣補埋嗰日嘅戲份。由於佢嘅傷口仲係好腫，所以開工前一日阿嬌食咗一日消腫藥，而劇組亦都盡量喺鏡頭方面遷就，譬如拍側面或遠鏡，劇組人員都大讚阿嬌好專業，估計阿嬌呢兩日會拆線。
來源 source: http://hk.on.cc
|
鍾意就快D Share啦！
|
|
|