【頭條獨家】被前度張致恆傷到入骨 32E莊韻澄拒絕得個樣男人埋身
莊韻澄（莊端兒、Xenia）曾經同張致恆拍拖4年，其間最出名當然是男方不停被踢爆有小三出現，結果兩人最終分手收場，雖然事隔4年，呢段情傷仍然對Xenia好大影響，她除了最近在ViuTV節目《吃掉前男友》提到渣男前度時爆喊外，Xenia接受《頭條日報》訪問時，提渣男前度亦句句有骨，她講明「應付過咁厲害」前度後，令她更審慎揀對象，所以一直單身，她𠵱家搵對象唔會再搵冇責任感、唔成熟、得個樣嘅對象，快將38歲的她更以結婚為大前提，更唔排除隨時閃婚。撰文：杜淑霞 攝影：李維隆
莊韻澄在昨晚首集《吃掉前男友》時，再度剖白與前度張致恆分手感受，從未試過有男友咁多外遇，當男方第二次出軌事件，她更是透過記者得知，更踢爆前度極度渣男行為，「嗰陣我同佢講呢個係我最後一樣可以幫你嘅嘢，你想我點回應記者？」豈料，男方竟開心話：「咁你話我哋分咗手喇！咁咪唔算偷食囉！」
這段情後Xenia一直單身，她坦承因被渣男情傷太重，「傷得都的確重嘅，以前嘅拍拖唔會係面對全香港，唔會登報紙，唔會咁大壓力，唔會要解釋，嗰陣時我選擇唔講任何嘢，𠵱家我應付過咁厲害嘅男朋友之後，我真係對揀男人嘅眼光係好咗嘅，雪亮咗嘅。」現在Xenia深信時間認清一個人，亦不會再啞忍渣男，「嗰時公開咗先知係咁大件事嘅，因為有拗撬有第三者，但啱啱先公開，會好似畀人玩咁，自己會有個唔忿氣喺入面，於是咪忍囉！會嘗試同佢克服或者解決，嗰陣時我都好唔果斷，為仔死為仔亡，都係付出型嚟。」
唔排除閃婚
有過這個深刻教訓後，Xenia坦承揀對象會更審慎，不會隨便開始一段關係，「我以前個男朋友做啲嘢好細心，好識得○氹女仔，當然追你嘅時候係會就住你喜好去做，你都開心嘅，因為你有好感嘛！但係就唔會識得分析佢係咪同時對好多女仔做啲咁嘢𠵱家都會多咗啲嘢去諗。以前會覺得人哋對你好好呀！好細心，呢個條件好好不如就同佢開始試吓自從同先前男朋友後，覺得開始一段關係好容易say個yes，或者一啲行動就得，但係你要結束一段關係係好痛苦，我同前男友唔係第一次分開，有少少離離合合，嘈過吓交，又會一齊又○氹番，經歷咗一段幾折磨嘅時間，所以𠵱家忍得好多，唔會話佢對你真係好細心，喺指定嘅時間搵你，幫你開晒車門，或者幫你做好多嘢，總之就隨傳隨到，唔會話因為呢一樣嘢。」
Xenia坦承以前是外貌協會會長，揀男友最緊要靚仔，但經歷過前度這個人版後，揀男友的條件都改變埋，「外表冇話一定要超靚仔，靚仔梗係好都唔會蝕咁多嘛！外表乾淨企理，你會見到鞋、衫，冇味呀，我都幾注意味道，味道我着緊！𠵱家真係注重溝通囉！外表已經冇咁緊要，你話大年紀定細年紀？我梗係想大過我但大過我嘅選擇唔多。另外，最緊要有責任感（之前嗰個全港人都知佢冇責任感！）佢得到佢應有嘅懲罰，佢𠵱家要好有責任感，佢要養家，要養三個人，佢再唔節制落去生第三個就大鑊𠵱家揀男人要好有責任感，知道自己做乜先，好清色晰有自己目標。」她又自言不急於搵對象，「但如果遇到啱會把握機會開始，到時真係閃婚都唔出奇。」
|
鍾意就快D Share啦！
|
|
|