粵劇大老倌阮兆輝與太太鄧拱璧一生跟梨園結下不解緣，輝哥從藝66年，這一年卻經歷了前所未有的危機，一場無情的疫症，不僅奪走了很多人的生命，更摧毀了無數家庭，因為政府對演藝界的資助不足，輝哥與太太想方法自救，誓要為粵劇界出分力！二人聯手舉辦《仝人同心抗疫重生》網上粵劇籌款演唱會，由33位大老倌義務演出，每日一曲籌款幫助同業，輝哥說：「個名係我諗嘅，重生？乜死咗咩？其實已經死咗一截，我哋真係需要『重生』，呢件事我哋應該做嘅。」
娛樂文化藝術工作陷於冰封時期，粵劇從業員也遇到難關重重，令他們大感心痛，璧姐說：「由1月28號到9月30號，全香港嘅騷唔夠5個，大家手停口停，冇得做即係冇飯食。唔單止心痛，心痛唔止係冇粵劇做，心痛大家生活搞到咁慘，心痛有識嘅人病咗，心痛冇嘢做喺屋企睇埋啲垃圾電視劇，今年係一個唔好嘅年。低層嘅業內工作者，我成日會同佢哋聯繫，我知道有一個住劏房嘅，搵兩萬多一個月，畀租都畀咗8,500蚊，仲要養個仔、食、畀交通、畀媽媽，點樣有積蓄呢？一閉館即係冇得開工，冇收入，即係冇得食，初時問朋友借，借借吓借唔到，有一日佢老婆要佢攞錢買餸，佢落街借得60蚊返嚟，佢太太嫌少，鬧佢做咗咁耐戲班得咁少錢！相嗌唔好口，繼而動武，跟住老婆拖埋個仔返四川。家庭破裂因為疫情、因為冇錢，你話破裂但解決到問題都話，但係問題係冇解決到，失業去到16年最高，成行都好淒涼，我哋要自救，唔係淨係等政府救濟，政府救濟唔到咁多人，我哋唔會坐喺度等死。」
香港經歷過戰亂，日本攻佔與六七暴動，每一次動盪也會令戲行流失慘重，不過卻不及這場疫情的驚人影響力，輝哥慨嘆說：「1967年後我哋冇咗三分一人，我哋見得太多，對我哋戲行好大打擊，今次嘅打擊仲大，而家希望可以拖慢佢嘅發生，惟有自救。成個粵劇界從來未試過，甚至乎喺戰爭時都未試過，我聽啲前輩講，抗戰時候，出面落緊炸彈，都有人睇，嗰時嘅心情係睇咗先算啦，都唔知幾時打到嚟，喺戰亂嘅時候都有戲做，反而而家突然間停晒！好心痛！」
「政府自己都講救濟唔足夠，而家都唔知個尾去到邊度，大家應該諗計，抗疫與民生攞到平衡，因為我哋有個最危險嘅地方，我哋嘅人係要訓練，好似我哋支持嘅其中一個係貨車，行內嘅搬運都係專業，佢哋知道啲箱係有特性，我哋有時用水路，要經過吊車吊上船，嗰個箱點樣打條纜、鈎邊度，佢亦要知道晒啲倉位置，佢哋保管住啲鎖匙，好有信用，全部都係專業，呢類人真係靠粵劇食飯，一停晒，喺邊度搵到一毫子返嚟？最危險嘅係基層嘅轉咗行未必會返嚟，咁就大件事，唔係幾個名演員就撐得住成行。而家入場話坐一半，其實只係得40幾巴仙，老人家嘅戲迷會流失，中年嘅唔睇開就唔睇，戲迷、戲行都流失，我哋喺好危險嘅邊緣。」
74歲的璧姐早前為籌辦這次演唱會勞心勞力，導致小中風，幸好及時發現求醫，現時有些微發音不準，平衡力也沒有之前好了，老伴輝哥感激太太的付出，出入也悉心照顧，但璧姐仍堅持親力親為：「日日都有人叫我唔好咁操勞，唔好食煙呀！做唔到㗎！既然成世都勞咗、成世食煙，夾硬唔勞、夾硬唔食煙唔開心多幾年，我就唔制囉！」身旁的輝哥也拿太太沒辦法，只好笑說：「嗯嗯嗯……呢個係佢嘅理論，唔係鼓勵大家食煙。我願望大家身體好啲，願望大家撐得過去，亦都願望世界上專家諗到平衡到嘅方法。」開心就是這樣簡單。
籌款成績相當理想，現時已有百萬善款，輝哥指不少海外的戲迷也紛紛支持，璧姐高呼：「齊心便是力量，香港精神！」
攝影：沈健程
攝錄：廖達燊
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
