國泰最近公佈重組方案裁減5,300名駐香港員工，「倖存」員工被迫簽新合約，福利大減，幾乎要減一半薪金，工會今日呼籲員工不要被「死線」分化。
慘食國泰「無情雞」嘅空姐阿Sa，離職時先同身邊朋友講自己做YouTuber，日前佢在「Smart Travel」頻道開live講吓航空界秘聞，同時為「倖存」嘅國泰員工打氣，希望高層日後加回員工酬金，佢更分別嚴選「十大好客」及「十大最討厭明星客」跟網民分享。
空姐阿Sa大爆馬德鐘對眼好似識放電咁，形容「好似想吞咗我咁」；又稱「潮流西客」又爆粗又沒禮貌，航空業界也怕怕；又試過有一個男星走去同人講自己好攰，叫人唔好問佢簽名及影相，但現場服務員根本冇人認識佢；又有一位巨星想行去廚房，通常都會講「excuse me」，但嗰個人就話「I just want to pass away（唔該畀我離世）」；又聽聞有啲藝人被人用「花紙」送到外國處理。
由於好多爆料，吸引成5千幾人收睇，佢亦開名讚黃子華、鄭伊健、黎明、陳慧琳、蔡卓妍、謝霆鋒、林峯、黃宗澤及汪明荃等都係相當友善的乘客， 更指吳君如私下好健談，跟外傭工人去外遊，佢會安排外傭坐商務位。
第1位 古天樂
超級靚仔的古天樂有一個好成功嘅經理人，份人好nice，深受空姐歡迎。
第2位 舒淇
以性感女星形象出道，空姐們都喜歡佢，因為佢唔會嘴藐藐、抬高個頭唔望人，有時舒淇好可愛，會主動同空姐傾偈，試過講自己感情問題，又會講自己曾經想過做空姐，可惜唔夠高，亦知道空姐工作好辛苦，主動為空姐打氣。
第3位 張曼玉
國際巨星的張曼玉一向好重視自己嘅另一半，當年跟法籍男友拍拖，當時佢坐頭等飛去巴黎，男友就坐經濟客位，起飛後，張曼玉見男友隔籬有位，即去經濟艙陪男友，空姐都打咗個突，因為一張頭等去巴黎嘅機票要成十幾萬，佢都唔坐，空姐只好把頭等嘅餐送過去佢嗰邊，佢亦相當有禮貌，毫無架子。
第4位 任賢齊
小齊係圈中出晒名嘅好好先生，有次佢一家人回台灣，太太同小朋友坐商務位，小齊坐頭等，起飛後即去妻子身邊，主動餵小朋友食嘢，臨落機前又行過去幫太太執行李，睇吓太太有冇拎漏嘢，對家人細心照顧，絕對唔係扮出嚟。
第5位 周潤發
以前冇iPad睇客人資料，所以往往最尾先有乘客資料，有次全機等一個人，原來發哥被fans包圍，遲咗上機，佢一到頭等艙，即第一時間跟機組人員逐一講對唔住。
第6位 陳奕迅
今年1月，歌神Eason有次在落機時被機組人員拉着合照，他當時面露倦容，仍然相當友善，勉強露出笑容，佢畀空姐印象非常好。
第7位 梁朝偉 劉嘉玲
電眼男神梁朝偉好親民，份人亦好健談，有次一個馬來西亞籍空姐在頭等遇到佢，佢搞笑跟空姐閒聊，梁朝偉講：「你知唔知我去日本滑雪戴晒裝備，好多人唔認得我，我不知幾爽。」梁朝偉雖然主動同空姐傾偈，但讓人感覺唔係溝女嗰種；有次劉嘉玲同關之琳同機去上海，關之琳離遠行過去，打扮樸素已經好搶眼，星味濃好似有光環咁，反而嘉玲坐飛機就冇化妝，只戴黑超，對空姐亦好有禮貌。
第8位 李心潔
李心潔坐飛機喜歡睇書，好有文青feel，講嘢又好斯文，嗰次李心潔坐長途機時，見佢細心照顧繼女，空姐阿Sa覺得佢性格好，「就算後嚟佢老公出軌，佢都冇同記者朋友講啲咩，好淡然面對，唔會亂講無謂嘢」，發現成功嘅人遇到緋聞都唔會特別回應。
第9位 張學友
張學友亦係大受歡迎，好靜好斯文，有一次坐長途機，佢個經理人先跟機組人員細聲講「學友好攰，唔可以影相」，之後學友在LA逗留六日，巧合在回程機，又係遇到同一隊crew，經理人又係跟機組人員先打招呼，指「張生今日OK，佢狀態冇咁攰，如果想影相簽名絕對冇問題」，空姐阿Sa有感「一個好歌手成功又有一個咁好嘅經理人，抵佢紅足咁多年」。
第10位 王菲
有次王菲在啟德機場落機，嗰日班機冇頭等，她就坐商務客位，見佢好似細路女咁，輕輕搵隻腳撐住前面嘅凳背，感覺似鄰家小女孩，而佢個好大嚿嘅經理人就坐喺佢隔籬，見過有一次她在行李輸送帶嗰邊，蹲喺地下，覺得佢好可愛，而且個性我行我素，不少空姐接觸過佢，佢外表雖然好cool，但其實內心溫柔，空姐想合照，佢都有求必應。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|