慘食國泰「無情雞」嘅空姐阿Sa，原本係機艙艙務長，一個唔覺意華麗轉身成為YouTuber，開頻道同大家開心share多年嚟喺航空業界所遇過嘅光怪陸離，上一篇文就講到佢分享唔少藝人喺機艙嘅好人好事，不過有好自然有衰，空姐阿Sa喺頻道亦同時列出空姐眼中嘅10大討厭藝人。雖然冇開名講，不過認真，一啲都唔難估。
第10位 大笑姑婆
空姐阿Sa指呢個藝人不嬲以大笑姑婆得意形象見稱，不過現實真人就係另一回事。空姐阿Sa話：「其實有人搵你影相，通常artist就算好攰都會影，唔會惡言相向，以前機艙冇咁嚴，有個𡃁妹好鍾意佢，想搵佢影相，但每次上到去佢都瞓着咗，到架機終於到咗，佢亦都醒咗，第一句就話『影啦影啦咁想影』」由於大笑姑婆嘅真性情嚇窒咗嗰位空中服務員fans妹妹，自此𡃁妹空姐就將大笑姑婆喺佢偶像名單中剔除咗。
第9位 藝術家導演
空姐阿Sa指自己曾經聽過有好多人唔鐘意呢位導演，遇見真人終於知點解。「有次呢位導演由東京坐機返港，咁佢喺東京買咗個陶瓷藝術品，就咁搵發泡膠薄薄咁包住，不過因為件行李太大件，機艙本身對行李size有限制，如果太大件，當遇到危急事件時，會阻住乘客逃生。咁最後嗰個藝術品都要寄艙。但運到返嚟爛咗，呢個導演要求航空公司賠償，仲call齊記者嚟，咁其實既然你件物件咁貴重，係咪應該買保險呢？點解要為難航空公司，精神勒索呢？」
第8位 豪門千金
空姐阿Sa話同事最怕人狂撳call light，試過遇到一位豪門千金坐頭等，呢位千金竟然每隔5分鐘就call light一次，問啲好雞毛蒜皮嘅嘢，或者要去廁所，就要求去之前預先叫空姐去block定個廁所。空姐阿Sa笑言：「咁其實頭等仲有其他頭等客，唔可以淨係招呼你一個，最後我哋係要叫返佢自己個助手幫手。呢件事令我諗到可能佢本身有太多兄弟姊妹，平時冇乜人留意，想要attention seeking，希望有多啲關注啩！」
第7位 爛口學者
除了娛樂圈藝人，空姐阿Sa仕途上遇到唔少名人，好似以出名鬧人見稱嘅學者，喺政壇上見人鬧人，又會引經據典，有次佢搭飛機香港去台北，點知班機因事延遲起飛，爛口學者即時鼓譟狂鬧人，阿Sa惟有用「拖字訣」應付。佢話：「佢嗰次搭商務，我冇第一時間走埋去同佢say hello，等佢冷靜吓先，到派餐時經過先同佢講唔好意思，佢即刻好熱誠咁同我握手，所以有時啲人粗聲粗氣唔代表心地唔好。」
第6、5位 踢波阿伯
咪以為年紀大火氣就會收，空姐阿Sa話遇過兩個踢波阿伯，其中有次佢喺其中一個踢波阿伯身邊經過，阿伯即刻好惡咁喝停佢：「喂，攞杯水畀我！」受委屈嘅阿Sa雖然照做，但心諗家教修養無論任何年紀都要學習。而阿伯嘅另一位好友亦係極品，近排呢位阿伯就有件威水史，不過嗰次佢同老婆去馬爾代夫，就𤓓到一個點。空姐阿Sa話：「嗰次喺機場見到佢，我就話乜生，你係咪搭我哋航機呀？佢好寸話『唔搭你哋機仲有其他機咩？』佢老婆即刻幫佢兜話「係有」，呢啲咪面係人畀……
第4位 心急人上
空姐阿Sa話心急人上本身在航空界都好出名，有幾單八卦是非都出過新聞見過街。有次呢位心急人上機，空姐就問佢攞boarding pass幫佢睇吓坐咩位，心急人唔知係咪嫌空姐手腳慢，一手搶過boarding pass。空姐阿Sa就講：「其實一個無禮嘅小動作，都會hurt到工作人員，不過見佢而家有個幸福家庭，希望佢會變好」
第3位 數字先生
空姐阿Sa有次聽到同事講，話數字先生同老婆由香港去倫敦，點知有個空姐唔小心撞到佢手臂，數字先生即霸氣話：「我屋企個工人都冇你咁蠢！」空姐阿Sa話個同事即刻匿埋一邊狂喊。之後為免再遇到呢兩公婆，機艙長就將佢調去第二個位。
第2位 餓鬼投胎
阿Sa話呢件事發生喺幾年前，當時餓鬼同屋企人一齊坐商務，本身已經食咗好多嘢，之後佢再嗌嘢食，空姐同佢講冇晒嗰個餐，餓鬼即發爛掉嘢。「其實啲餐係公司嘅，你想食梗係任你食，最好食飽啲去瞓，不過飛機上有啲餐唔係咁多數目，好似食粥咁，20幾個客得4個粥，呢個客食完一碗粥就同空姐講，要多一碗，舊同事就同佢講『唔好意思，冇晒粥呀，可唔可以揀過第二樣』，你估佢點呀，佢將個餐牌揈出嚟，飛去枱面話『冇嘢啦，走』」阿Sa仲畀提示話呢位客人近排去澳門都發生咗一件令人側目嘅事，從而睇到佢嘅真性情。
第1位 潮流西客
話明係航空界最討厭嘅人第1位，當然係聞風喪膽，連空姐阿Sa都話呢個人喺空姐眼中出晒名。「所有空姐見到呢個人都頭痛，聽返嚟講粗口惡言侮辱乜都齊，掉嘢都好閒，試過有次call保安，機長行埋去，你估佢點講？『You are just my driver！』但係唔知點解，佢又冇俾呢間航空公司blacklist喎，佢而家生咗個女，或者可以對人nice啲啦。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|